ЖССТ бир гуруҳ америкаликларга қарши судда ютиб чиқди

Жаҳон соғлиқни сақлаш ташкилоти бир гуруҳ америкаликларга қарши суд ишида ютиб чиқди. Аввалроқ америкаликлар ЖССТни коронавирус пандемиясига жавоб беришда масъулиятсиз қилишда айблаганди.

Фото: Reuters

Reuters ахборот агентлигининг хабар беришича, АҚШдаги суд Нью-Йорк штатининг Уэстчестер округида яшовчи 7 кишининг ЖССТ устидан судга берган даъво аризасини қондиришни рад этган.

АҚШ округ судьяси Кэти Сейбел ЖССТ 1948 йилдаги конституцияси ва халқаро ташкилотнинг иммунитети ҳақидаги қонунга кўра жамоавий арзномадан иммунитетга эга эканлигини маълум қилган.

Арз қилувчилар – коронавирусга чалинган шифокор ва 6 нафар маҳаллий фуқаро ЖССТ коронавирус эпидемияси бошида касалланишлар сонини камайтириб кўрсатгани ва глобал жавоб чораларини тезкорлик билан кўрмагани, бунинг оқибатида эса юз минглаб одамларга зарар етказилганини важ қилиб, халқаро ташкилотдан товон пули талаб қилган.

Суд чиқарган қарорга кўра, арзномада ЖССТ эпидемия бошида халқаро тиббий-санитар қоидаларга мувофиқ ўзининг вазифаларини бажара олмагани ва самарали бошқарувни таъминлай олмагани ҳақида умумий ва ноаниқ даъволар келтирилган.

Тайёрлаган: Шуҳрат Раҳимов

#АҚШ #ЖССТ