Россиянинг Санкт-Петербург шаҳрида бокс бўйича «Губернатор кубоги» ўз якунига етди. Унда иштирок этган Ўзбекистон терма жамоаси жами 6та медаль жамғарди.
24 апрел куни финал жангларида қатнашган ўзбекистонлик 5 спортчининг 4 нафари баҳсларни муваффақиятли якунлади.
-69 кг вазн тоифасида иштирок этган Бобоусмон Батуров ярим финалда қозоғистонлик Асланбек Шимбергеновга ютқазиб (у финалда ҳам ғалаба қозонди) бронза медали билан кифояланди.
Финалда Нодиржон Мирзаҳмедов (-49 кг), Шаҳобиддин Зоиров (-52 кг) ва Миразизбек Мирзахалилов (-57 кг) ўз рақибларини бирин-кетин енгиб, олтин медалларни қўлга киритишди, Абдумалик Халаков (-60 кг) эса россиялик Альберт Батиргазиевга ютқазиб қўйди.
+91 кг вазн тоифаси финалида Баҳодир Жалолов мусобақа мезбонларидан бири Иван Верясовни нокаутга учратиб, турнирни якунлаб берди.
Финалда қайд этилган натижалар:
- -49 кг: Нодиржон Мирзаҳмедов – Игорь Царегородцев (Россия) 4:1 (ғалаба)
- -52 кг: Шаҳобиддин Зоиров – Маҳмут Сабирхан (Қозоғистон) 5:0 (ғалаба)
- -57 кг: Миразизбек Мирзахалилов – Дмитрий Спивак (Россия) 5:0 (ғалаба)
- -60 кг: Абдумалик Халаков – Альберт Батиргазиев (Россия) 0:5 (мағлубият)
- +91 кг: Баҳодир Жалолов – Иван Верясов (Россия) (Баҳодир иккинчи раундда рақибини нокаутга учратди)
Турнирда Ўзбекистон ва Россия 4тадан олтин медал жамғаришди, россияликларда кумуш кўпроқ (6та), Қозоғистон 2та олтин медал билан учинчи бўлди.