Лукашенко Беларусга Россия қўшинлари киритилиши мумкинлигини истисно қилмади

Беларусь президенти Александр Лукашенко зарурият туғилса, республикада Россия қуролли кучларини жойлаштиришга тайёрлигини айтди.

"Агар биз қураётган иттифоқ давлат, Беларусь ва Россия хавфсизлиги учун бу ерда барча турдаги қуролларга эга бўлган қуролли кучларни жойлаштириш зарур бўлса – бу ерга зудлик билан жойлаштирилади", - деди Лукашенко.

Унинг таъкидлашича, ҳозирча бунга зарурат йўқ.

"Биз мустаҳкам, жамланган қуролли кучларга эгамиз. Керак бўлганида қисқа вақт ичида 500 минг кишини қуроллантира оламиз. Агар бу камлик қилса, бу ерга Россия Федерацияси қуролли кучлари киритилади. Ҳеч қачон бундай бўлмайди. Аммо керак бўлса, ўйлаб ўтирмаймиз", - деди Беларусь президенти.

У шунингдек, мамлакатда Россия базаларини жойлаштириш масаласи ҳеч қачон юқори даражада муҳокама қилинмаганини айтди.