АҚШда Хитойнинг йирик телекоммуникация компанияси лицензияси тўхтатилди

АҚШда Хитойнинг энг йирик телекоммуникация компанияларидан бири China Telecom’нинг лицензияси вақтинча тўхтатилди. Вашингтон буни компания АҚШнинг миллий хавфсизлигига таҳдид солиши билан тушунтирган.

Фото: AFP

Reuters ахборот агентлигининг хабар беришича, China Telecom 60 кунга АҚШда хизматлар кўрсатишни тўхтатиши керак.

АҚШнинг алоқа бўйича федерал комиссияси (FCC) вакилларининг таъкидлашича, Хитой ҳукумати томонидан назорат қилинувчи компания “АҚШдаги алоқа каналларига кириши, улардаги маълумотларни сақлаши, улар ишига тўсқинлик қилиши” мумкин. Бу эса компанияга “жосуслик ёки АҚШга зарар етказиши мумкин бўлган бошқа турдаги фаолият билан шуғулланишга” имкон беради.

АҚШда 20 йилдан бери хизматлар кўрсатувчи China Telecom Вашингтоннинг бу қарорини “ранжитувчи” деб атаган.

“Биз мижозларимизга хизмат кўрсатишни давом эттириш учун барча имкони бор вариантлардан фойдаланмоқчимиз”, деб айтилган компания баёнотида.

China Telecom Хитой телекоммуникация бозорида етакчилик қилувчи учта компаниядан бири ҳисобланади. Компания 110 та давлатда 335 млндан кўпроқ мижозга эга. У кенг полосали интернетдан тортиб то мобил ва стационар телефон тармоқларини қамраб олувчи кенг турдаги хизматларни тақдим қилади.