Дунё бўйича ҳибсга олинган журналистлар сони рекорд кўрсаткичга етди

2021 йилда оммавий ахборот воситаларининг ҳибсга олинган ходимлари сони ўтган йилдагига нисбатан 20 фоизга ошди ва рекорд даражага етди. Бу ҳақда «Чегарасиз мухбирлар» ташкилоти ҳисоботида айтилмоқда.

Ҳисоботга кўра, 1 декабр ҳолатига дунё бўйича камида 488 нафар журналист, жумладан, 60 нафар аёл ўз фаолияти туфайли ҳибсга олинган.

Қайд этилишича, энг хавотирли вазият Хитой, Мьянма ва Беларусда кузатилмоқда. Бу мамлакатларда 212 нафар ОАВ ходими панжара ортида сақланмоқда. Вьетнам ва Саудия Арабистони ҳам қўшиб ҳисобланганда, дунёдаги барча ҳибсга олиш ҳолатларининг 59 фоизи ана шу беш мамлакатга тўғри келади.

Ҳозирда 65 нафар журналист ўғирлаб кетилган деб ҳисобланмоқда. Бу борадаги деярли барча ҳолатлар Сурия, Ироқ ва Яманда юз берган.

Фаолияти вақтида 46 нафар ОАВ ходими ҳалок бўлган – бу 2003 йилдан буён қайд этилган энг паст кўрсаткич. Журналистлар ҳаёти учун энг хавфли мамлакатлар сифатида Мексика, Афғонистон, Яман ва Ҳиндистон кўрсатилган.