Ўзбекистонга импорт бензин асосан Россия ва Туркманистондан олиб келинмоқда

2021 йилда Ўзбекистонга қанча бензин импорт қилингани маълум бўлди. Давлат статистика қўмитаси тегишли хабар билан чиқди.

Фото: ТАСС

Қўмита маълумотларига кўра, 2021 йилда Ўзбекистонга қиймати 136,6 млн АҚШ долларига тенг бўлган 341,5 млн литр автомобил бензини импорт қилинган.

Қайд этилишича, автомобил бензини импорти 2020 йил билан солиштирилганда 97,3 млн литрга ошган.

Ўзбекистон автомобил бензинини импорт қилган асосий давлатлар орасида Россия етакчилик қилмоқда – 172,5 млн литр. Кейинги ўринларда 147,8 млн литр бензин олиб келинган Туркманистон ва 16 млн литр бензин импорт қилинган Қозоғистон бормоқда.

Шунингдек, Ўзбекистон Ироқдан 3,6 млн литр бензин импорт қилган, Эрондан эса 1,8 млн литр бензин олиб кирилган.

Аввалроқ, Ўзбекистон бензин импортини оширгани хабар берилганди.

2021 йилнинг январь-ноябрь ойларида Ўзбекистонга қиймати 115,3 млн АҚШ долларига тенг бўлган 308,4 млн литр автомобил бензини импорт қилинган. Автомобил бензини импорти ўтган йилнинг мос даврига нисбатан 112 млн литрга ошган.