Зеленский Путин билан учрашишга тайёрлигини айтди

Владимир Зеленский Россия президенти билан воситачиларсиз, ултиматумларсиз мулоқот қилмоқчилигини таъкидлади.

Фото: DPA

Украина Россия билан музокараларда Россия кучларининг 24 февралгача бўлган жойларига қайтишларини муҳокама қилади, деди Украина президенти Владимир Зеленский.

Зеленский Италиянинг Rai 1 телеканалига берган интервюсида Россия президенти Владимир Путин билан учрашишга тайёрлигини ҳам айтди.

«Мен Путин билан воситачиларсиз гаплашишга тайёрман. Фақат у билан, лекин воситачиларсиз ва ултиматумлар билан эмас, мулоқот шаклида. Ҳар бир урушдан кейин тинчлик келишини тушунамиз ва агар урушни мулоқот билан тугатиш имконияти бўлса, бу имкониятдан фойдаланиш керак», — деди у.

Шу билан бирга, Украина президенти Россия билан мулоқот қилиш босқичи ўтиб кетганини таъкидлади. Унинг фикрича, вазиятни барқарорлаштириш учун томонларга прагматик музокаралар зарур.

Тайёрлаган: Дилшод Аскаров

#Владимир Путин #Володимир Зеленский