Самарқандда Зарафшон дарёси ўзанидаги 4 гектар бутазор ёниб кетди

Дарё ўзанида жойлашган бутазорга номаълум шахслар ўт қўйган. Ҳозирда ҳолат юзасидан суриштирув олиб борилмоқда.

Фото: Экология ва атроф-муҳитни муҳофаза қилиш бошқармаси

Самарқанд вилояти Экология ва атроф-муҳитни муҳофаза қилиш бошқармаси ахборот хизматининг хабар беришича, жорий йил 8 июл куни тушдан сўнг Зарафшон дарёси Қорадарё ирмоғининг Самарқанд тумани "Захлик" маҳалласи ҳудудидан оқиб ўтувчи қирғоқ минтақасида ёввойи ҳолда ўсадиган юлғунзор номаълум шахслар томонидан ёқиб юборилган.

Ҳолат туман ФВБ ёнғин-қутқарувчилари томонидан тезкор тартибда бартараф этилган. Аниқланишича, ёнғин оқибатида 4 гектар ер майдонидаги бута ва юлғунлар ёниб кетган.

Қайд этилишича, ҳозирда Самарқанд тумани Экология ва атроф-муҳитни муҳофаза қилиш бўлими ва тегишли мутасадди ташкилотлар томонидан ҳолат юзасидан қонунда белгиланган тартибда суриштирув ва ўрганиш ишлари олиб борилмоқда.