Қамчиқдаги ЙТҲ 9 та автомобил иштирокида содир бўлгани маълум қилинди

ИИВ Жамоат хавфсизлиги департаменти Йўл ҳаракати хавфсизлиги хизмати Қамчиқ довонидаги йирик ЙТҲ юзасидан қўшимча маълумот берди.

Маълум қилинишича, Volvo юк автомобили ўзи билан бир йўналишда ҳаракатланиб кетаётган Matiz, Cobalt, Isuzu юк машинаси, Nexia-2, Cobalt, MAN юк машинаси, Cobalt ва Spark’ни уриб юборган.

Оқибатда 3 та Cobalt, Spark ҳамда юк автомобилларида ёнғин келиб чиққан, воқеа жойида 3 нафар фуқаро вафот этган. Автомобиллар салонида бўлган 7 нафар йўловчи тан жароҳати олиб, Тошкент вилояти, Ангрен шаҳри ҳамда Наманган вилояти, Поп туманидаги Марказий шифохонага юборилган.

Ушбу ЙТҲ юзасидан Наманган вилояти Поп туман ИИБ ҳузуридаги ТБ томонидан терговга қадар суриштирув ҳаракатлари олиб борилмоқда.

Бундан олдинроқ ФВВнинг ушбу ҳодиса юзасидан берилган хабарида шифохонага ётқизилган беморлардан бири вафот этгани айтилганди.