Илон Маск Twitter'ни сотиб олиш режасига қайтди

АҚШ Қимматли қоғозлар ва биржалар комиссияси Маск адвокатининг Twitter раҳбариятига компанияни ҳар бир акция учун 54,20 доллардан сотиб олиш ниятида экани ҳақида юборган хатини эълон қилди.

Фото: Getty Images

Америкалик миллиардер Илон Маск шу номдаги ижтимоий тармоққа эгалик қилувчи Twitter'ни 2022 йил апрелида келишилган шартлар асосида сотиб олмоқчи. Бу 4 октябр, сешанба куни АҚШда биржалар ва қимматли қоғозлар савдосини назорат қилувчи АҚШ Қимматли қоғозлар ва биржалар комиссияси (SEC) томонидан чоп этилган тадбиркор адвокатининг Twitter раҳбариятига йўллаган мактубида айтилган.

Tesla ва SpaceX асосчиси у ва Twitter раҳбарияти ўртасидаги ҳуқуқий келишмовчиликни тугатишни келишув шарти, деб атаган. Дэлавер штати суди Twitter'нинг Маскка қарши даъвоси бўйича ишни кўриб чиқиш жараёнини 17 октябрга белгилади.

Twitter мактуб олинганини тасдиқлади ва «компания ушбу битимни якунлаш ниятида» эканлигини қўшимча қилди. Twitter расмийларининг айтишича, сотув Маскнинг апрель ойидаги ҳар бир акция учун 54,20 доллар (тахминан 54 евро) нархида амалга оширилади. Шундай қилиб, битимнинг умумий суммаси 44 миллиард долларни ташкил қилиши керак.

Илон Маскнинг битимни ёпиш нияти Америка ОАВлари томонидан эълон қилинганидан сўнг, Twitter акциялари нархи кескин кўтарилди ва Нью-Йорк фонд биржасида у билан савдо қилиш икки марта тўхтатилди.

8 июль куни сайёранинг энг бой одами бўлган Илон Маск Twitter'ни сотиб олиш бўйича келишувни бекор қилганини билдирди. Унинг таъкидлашича, компания «бирлашиш шартномасининг кўплаб қоидаларини жиддий равишда бузган». Хусусан, Маскнинг таъкидлашича, Twitter'даги сохта ва спамли аккаунтларнинг ҳақиқий сони ижтимоий тармоқ кўрсатган «беш фоиздан кам»дан сезиларли даражада кўп.

Ўшанда оммавий ахборот воситалари иқтисодий экспертлар америкалик тадбиркорнинг Twitter'ни қўлга киритиш ниятлари жиддийлигига анчадан бери шубҳа билан қарашганини таъкидлади. Компаниянинг 28 миллиард долларга баҳоланган бозор қиймати Маск унга таклиф қилган 44 миллиард доллардан анча паст.

12 июль куни Twitter Илон Маскни апрель ойида тузилган харид шартномаси шартларини бажаришга мажбурлаш ниятида судга мурожаат қилди. Июль ойи охирида миллиардер қарши даъво билан чиқди.

Маск ва Twitter ўртасида тузилган харид шартномаси шартларига кўра, томонлардан бири ундан воз кечса, бир миллиард долларгача жарима кўзда тутилган.

Тайёрлаган: Отабек Матназаров

#Twitter #Илон Маск