Иш вақти режими турли хил вариантларини белгилаш механизмлари жорий этиляпти

Президент томонидан “Меҳнат кодексини тасдиқлаш тўғрисида”ги қонун имзоланди.

Қонунчилик палатаси депутати Нодир Тилаволдиевнинг ёзишича, иш берувчи иш ҳақини кечиктириш учун жавобгарлиги (кечиктирилган ҳар бир кун учун қайта молиялаш ставкасининг 10 фоизи миқдорида) назарда тутилмоқда, ходим пенсия ёшига етгани муносабати билан иш берувчи ташаббуси билан меҳнат шартномасини бекор қилиш асоси чиқариб ташланди, ишдан бўшатиш нафақасини иш берувчида ишлаган иш стажига қараб дифференциациялашган миқдори белгиланди.

Меҳнат низоларини кўриб чиқиш жараёнида жамоатчилик назорати механизмлари акс эттирилди. Якка меҳнат низолари комиссияларда ёки судда ҳал этилиши ҳолатлари кўрсатилган, якка меҳнат низоcи медиаторга юборилишини жорий этиш, меҳнат арбитражи тизими йўлга қўйилади. Низоларни муқобил ҳал қилиш имкониятлари кенгайтирилиб, судлардаги иш ҳажми камайтирилди. Айрим тоифадаги ходимлар меҳнати ҳуқуқий жиҳатдан тартибга солинди.

Иш берувчи томонидан иш вақти режими турли хил вариантларини белгилаш механизмлари (сменали иш, мослашувчан иш режими, иш кунини қисмларга бўлиш ва бошқалар) жорий этилмоқда. Микрофирмалар, ЯТТда меҳнат қонунчилиги соддалаштирилиши, иш берувчиларга муддатли меҳнат шартномасини тузиш асослари сезиларли даражада кенгайтирилиши ҳамда иш берувчи томонидан хизмат текширувларини ўтказиш ва ишдан четлаштириш тартибга солиниши иш берувчиларга фаолиятларини олиб бориш учун қўшимча қулайликлар яратади.