Ўзбекистон миллий жамоаси 20 ноябрда Россияга қарши ўйнайди

«Ўзбекистон миллий жамоаси 13 ноябрь куни Тошкентда навбатдаги ўқув-машғулот йиғинларига киришади. Йиғин доирасида жамоамиз иккита ўртоқлик учрашувида иштирок этиши режалаштирилган. 

Дастлабки ўйин 16 ноябрь санасида Қозоғистон миллий жамоасига қарши бўлиб ўтишини маълум қилгандик. Шунингдек, Сречко Катанец шогирдларининг 20 ноябрь кунги рақиби ҳам маълум. Футболчиларимиз Россия терма жамоасига қарши майдонга тушадилар. Учрашув «Пахтакор» стадионида соат 17:00да старт олади», - дейилади ЎФА хабарида.

Аввалроқ, Россия миллий жамоасининг 19 ноябрь куни Санкт-Петербургда ўтказилиши белгиланган Босния ва Герцеговинага қарши ўртоқлик баҳси боснияликлар сафидаги Эдин Жеко, Миралем Пьянич ва яна бир қатор ўйинчиларнинг Россия билан ўртоқлик ўйинидан бош тортгани сабаб бекор бўлганди. Кўп ўтмай, рус нашрлари Россия Ўзбекистон билан ўйнаш таклифи билан чиққани, томонларнинг бу борадаги музокаралари анча вақт тўхтаб қолгани, аммо ҳозирга келиб ташкилотчилар келишувга эришишга яқинлиги ҳақида хабар берилганди.

Эслатиб ўтамиз, Сречко Катанец мураббийлигидаги Ўзбекистон миллий жамоаси 16 ноябрь куни Қозоғистон миллий жамоасига қарши халқаро ўртоқлик ўйинида иштирок этади. Учрашув 16 ноябрь куни соат 18:00 да «Пахтакор» стадионида бўлиб ўтиши режалаштирилган. Россия миллий жамоаси эса 17 ноябрь куни Душанбеда Тожикистонга қарши ўйин ўтказади.