Туркманистонда Аҳал вилоятининг янги маъмурий маркази шаҳар мақомини олди ва Arkadag деб номланди.
Бу ҳақда Туркманистон ҳукумати мажлисида Миллий Генгеш парламенти раиси Гулшот Маммедова маълум қилди. Унинг аниқлик киритишича, қарор қабул қилишда барча вилоятлар аҳолисининг хоҳиш-истаклари, жамоат ташкилотларининг таклифлари инобатга олинган.
Arkadag (Орқатоғ, ҳомий) - Туркманистоннинг иккинчи президенти ва ҳозирги давлат раҳбари Сердар Бердимуҳамедовнинг отаси Гурбангули Бердимуҳамедовнинг унвони ҳисобланади. Янги шаҳарга ном танлаш биринчи президент Сапармурод Ниёзов (унвони - Туркманбоши) вафот этган куни эълон қилинди.
Аввалроқ, Туркманистонда Сапармурод Ниёзов ва унинг онаси Гурбансултон эже шарафига номланган бир неча шаҳар ва қишлоқлар номи ўзгартирилган эди.
Аҳал - Туркманистоннинг бешта вилоятидан бири бўлиб, мамлакатнинг марказий ва жанубий қисмларини эгаллайди.
Тахминан 70 минг киши истиқомат қиладиган янги маъмурий марказ Ашхободдан 30 км жануби-ғарбда жойлашган 950 гектар майдонда қурилмоқда. Мега-лойиҳани амалга ошириш 2019 йилда бошланган.