Эрдўған Швециянинг НАТО аъзоси бўлишини қўллаб-қувватлаш шартини айтди

Туркия президенти Ражаб Тоййиб Эрдўған Швецияга НАТО аъзоси бўлиш учун «бекорга вақт сарфламасликни» тавсия қилди.

Туркиянинг ҳукмрон Адолат ва тараққиёт партиясининг парламентдаги фракцияси йиғилишида сўзга чиққан Эрдўған Анқарада шундай деди: «Биз учун муқаддас китоб Қуръонни ёқиб юбориш каби ҳаракатларга Швецияда рухсат берилар экан, биз Стокҳолмнинг Алянсга қўшилиш ҳақидаги аризасига «ҳа» деб жавоб бермаймиз».

Туркия раҳбарининг сўзларига кўра, Швециядан фарқли равишда Анқаранинг Финляндия аризасига муносабати ижобий.

«Бизнинг Ҳелсинки таклифига муносабатимиз ижобий, лекин Швециянинг мурожаатига нисбатан салбий. Шунинг учун Стокҳолм [НАТО аъзоси бўлишга уриниб] бекорга вақт сарфламаслиги керак», деди Туркия раҳбари.