Андижонда 1 кило гашишни сотишга уринган шахс қўлга олинди

Андижон вилояти Асака туманида гашиш гиёҳвандлик моддасини сотишга уринган шахс қўлга олинди. Бу ҳақда вилоят ИИБ ахборот хизмати хабар бермоқда.

Қайд этилишича, 28 март куни Андижон вилояти ИИБ Тезкор қидирув хизмати жиноят қидирув бошқармаси ходимлари бошқа ҳуқуқни муҳофаза қилувчи органлар билан ҳамкорликда тезкор тадбир ўтказган. Тадбир давомида Марҳамат туманида яшовчи Х.Б. Асака тумани ҳудудида холис харидорга 1 килограмм гашиш гиёҳванд моддасини 8,6 минг АҚШ долларига сотаётганида қўлга олинган.

Мазкур ҳолат юзасидан Асака тумани ИИБ ҳузуридаги Тергов бўлинмаси томонидан Жиноят кодексининг 273-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб, тергов ҳаракатлари олиб борилмоқда.