Ўзбекистон ташқи ишлар вазири Бахтиёр Саидов мамлакатдаги дипломатик миссиясини якунлаётган Венгрия элчиси Дьюла Ковачни қабул қилди.
Фото: ТИВ
«Венгрия элчиси Дьюла Ковач жанобларига мамлакатимиздаги фаолияти давомида Ўзбекистон-Венгри икки томонлама муносабатларини стратегик шериклик даражасига кўтаришга қўшган муҳим ҳиссаси учун самимий миннатдорлик билдирдик», - деб ёзди Ўзбекистон ТИВ раҳбари ўзининг Telegram-каналида.
Бахтиёр Саидов элчи Ўзбекистондаги дипломатик миссиясини якунлар экан, унга келажакда улкан муваффақиятлар тилаган.
Дьюла Ковач 2021 йил 27 декабрь куни Ўзбекистон Президентига ишонч ёрлиқларини топширган эди. У Тошкентда Венгрия элчихонасини очган ва унга 2016-2021 йилларда раҳбарлик қилган Петер Сантонинг ўрнини эгаллаган.
