Исроил-Фаластин зиддиятига муносабатимиз адолат ва ҳалолликка асосланган, деди Туркия раҳбари.
Туркия президенти Ражаб Тоййиб Эрдўған, Бештепа Миллий конгресс ва маданият марказида бўлиб ўтган Туркия Ёшлар жамғармасининг (TÜGVA) ташкилий йиғилишида иштирок этди.
Президент нутқ сўзлаб, Исроил-Фаластин можаросига алоҳида эътибор қаратди.
«Биз асрлар давомида адолатдан воз кечмаган халқмиз. Исроил-Фаластин зиддиятига муносабатимиз адолат ва ҳалолликка асосланган», - деди Эрдўған.
У АҚШнинг бу борадаги позициясини танқид қилиб, дунёнинг барча давлатларини тинчликка эришиш учун ҳаракат қилишга чақирди.
«Америка каби давлат учун нима кўпроқ мос келади? У тинчлик ўрнатишга интиляптими ёки оловни янада кучайтиряптими?» - деди президент.
Эрдўған бутун дунё эътиборини қамалдаги Ғазо секторида оғир ҳуманитар вазиятга қаратди:
«Ғазода сув ҳам, нон ҳам, озиқ-овқат ҳам йўқ. Бу Инсон ҳуқуқлари умумжаҳон декларациясига зиддир. Ғарб қаерга қараяпти? Улар ҳозиргача қандай чоралар кўрди? Ҳеч қандай!»
Ҳар қандай уруш маълум қонун-қоидаларга кўра олиб борилиши кераклигини таъкидлаган президент Эрдўған Ғазонинг бомбардимон қилинишини қирғинга қиёслади.
«Ғазодаги қирғинни ҳеч нарса билан оқлаб бўлмайди», деди у.
«Ғазонинг 2 миллион аҳолисига электр, сув, ёнилғи ва озиқ-овқат таъминотини узиб қўйиш ғайриинсонийликдир ва уруш қоидаларида бундай нарса йўқ», - деди Эрдўған.
Унга кўра, давлатлар қонунларга риоя қилиши ва бунинг учун жавобгарликни зиммасига олиши шарт: «Гуруҳлардан фарқли ўлароқ, давлатлар уруш қонунлари ва инсон ҳуқуқларини ҳурмат қилишга мажбур. Бу чегара аста-секин йўқолиб бораётганини кўряпмиз».
Президент таъкидлашича, ҳозир энг муҳим вазифа кескинликни пасайтириш, тинчлик ўрнатишдир.
«Биз можаролар минтақамизга тарқалишини истамаймиз. Минтақада овози ва таъсири бўлганларни кескинликни пасайтиришга, кимнидир кўр-кўрона қўллаб-қувватламасликка чақирамиз», - деди Эрдўған.
