Ҳарвард университети президенти истеъфога чиқди

Ҳарвард университети президенти, университет тарихида бу лавозимни эгаллаган биринчи афро-америкалик ва иккинчи раҳбар аёл Клодин Гай 2 январ, сешанба куни истеъфога чиқишини эълон қилди. У бу қадамни ўзига қарши кўчирмачилик ва университетда антисемитизмга қарши кураш йўқлиги бўйича айбловлар фонида қўйган. 

«Мен сизларнинг кўпларингиз билан бу буюк университетни асрлар давомида ривожлантирган академик юксакликка садоқатни илгари суриш бўйича ишлаш имкониятини мамнуният билан қабул қилдим. Аммо (Ҳарвард университетини бошқарувчи) корпорация аъзолари билан маслаҳатлашгандан сўнг, Ҳарвард манфаатларини ҳимоя қилиш учун мен истеъфога чиқишим кераклиги маълум бўлди. Шунда бизнинг ҳамжамиятимиз алоҳида шахсларга эмас, балки институтга эътибор қаратиб, ушбу фавқулодда қийин вазиятни енгиб ўтиши мумкин», дейилади Гайнинг баёнотида.

Клодин Гай 2023 йил июлидан бери Ҳарвард университети президенти лавозимида ишлаб келаётганди. Сўнгги ойларда олимага нисбатан танқидлар кучайди, чунки у ўз илмий нашрларида манбаларга ҳаволаларни тўғри қўймайди. Охирги бундай айбловлар 1 январ куни The Washington Free Beacon консерватив онлайн-нашрида пайдо бўлди. The New York Times газетасининг ёзишича, нашр сўнгги бир неча ҳафта ичида Гайга қарши кампания олиб борган. 

Антисемитизмни бостирмаслик бўйича айбловлар 

Айниқса, Клодин Гайга нисбатан қаттиқ танқидлар Ҳарвард ҲАМАС ҳаракатининг Исроилга ҳужумини етарлича қораламагани учун янгради. Худди шу нарса фаластинликларни қўллаб-қувватлаш акцияларига ҳам тааллуқли, улар баъзи талабалар томонидан кампус ҳудудида уюштирилди.

Гайнинг позициясидан норозилик декабр ойи бошида, танқидчиларга кўра, у АҚШ Конгрессида яҳудий халқини геноцидга чақириш Ҳарвард талабалари учун ахлоқ қоидаларини бузадими ёки йўқми, деган саволга тўғри жавоб бермаганидан кейин янада кучайди.

Аввалроқ АҚШ Конгрессининг 70 дан ортиқ аъзоси Клодин Гайни Ҳарвард президенти лавозимидан истеъфога чиқишга чақирган эди. Шу билан бирга, университетнинг бир қатор нуфузли битирувчилари ва донорлари, шунингдек, Ҳарварднинг 700 дан ортиқ профессор-ўқитувчилари Гайни қўллаб-қувватлаб чиқди.

NYT маълумотларига кўра, Гайнинг истеъфосини Ҳарвард битирувчилари яҳудий алянси олқишлаган, у, ўз маълумотларига кўра, университетнинг бир неча минг битирувчилари манфаатларини ифодалайди. «Клодин Гай Ҳарвардда нафрат тарқатмоқчи бўлганларни жимгина рағбатлантирди, бу ерда энди кўплаб яҳудийлар ўзини хавфсиз ҳис қилмаяпти», дейилади гуруҳ баёнотида. 

Исроил-Фаластин можароси

7 октябр куни эрталаб ҲАМАСнинг ҳарбий қаноти - «Иззаддин ал-Қассам бригадалари» Исроилга қарши «Ал-Ақсо тўфони» операцияси бошланганини эълон қилди. Ғазо секторидан Исроил томон минглаб ракеталар отилди, қуролли гуруҳлар Исроил аҳоли пунктларига кирди.

ҲАМАСнинг билдиришича, операция босиб олинган Шарқий Қуддусдаги Ал-Ақсо масжидига бостириб кириш ва исроиллик муҳожирларнинг фаластинликларга нисбатан зўравонлиги кучайиб бораётганига жавобан амалга оширилган.

Бунга жавобан Исроил армияси Ғазо секторида ҲАМАСга қарши ўнлаб қирувчи самолётлардан фойдаланган ҳолда «Темир қиличлар» операцияси бошланганини эълон қилди. 

Исроил-Фаластин можароси авж олгандан бери 22 мингдан ортиқ фаластинлик ҳалок бўлди. Исроилда қурбонлар сони 1400 дан ошади. Ғазонинг 2,3 миллион аҳолиси Исроилнинг ҳаводан оммавий бомбардимон қилиши ва эксклавнинг тўлиқ блокадаси туфайли озиқ-овқат, сув ва дори-дармонлар танқислигидан азият чекмоқда.