Миш-мишларга кўра, бу йил асосий iPhone 16 Plus бўлмайди, унинг ўрнига иккита янги SE модели сотувга чиқади.
Ижтимоий тармоқда Majin Bu тахаллуси остида яширинган таниқли Apple инсайдери янги авлод iPhone смартфонлари ҳақидаги маълумотлар билан ўртоқлашди. Унинг сўзларига кўра, компания бир вақтнинг ўзида iPhone 16 линиясининг бешта моделини тайёрламоқда.
Гап қуйидаги моделлар ҳақида:
- iPhone 16 – 6,3 дюймли 120 Гц частотали экран, иккита камера;
- iPhone 16 Pro – 6,3 дюймли 120 Гц частотали экран, учта камера;
- iPhone 16 Pro Мах – 6,9 дюймли 120 Гц экран, учта камера, рекорд даражадаги батарея.
- iPhone 16 SE ва 16 Plus SE – 6,1 ва 6,7 дюймли 60 Гц экран, битта камера, кичикроқ батарея, арзонроқ нарх.
Шундай қилиб, бу йил асосий Plus бўлмайди ва унинг ўрнини SE префикси билан иккита янги модел эгаллайди. Улар ўрта бюджет сегментида сотилиши кутилмоқда.
Инсайдернинг таъкидлашича, бу маълумотларга 100 фоиз амин эмас. Лекин у Apple ҳақиқатан ҳам битта камерали ва 60 Гц экранли смартфонни синовдан ўтказаётганини аниқ тасдиқлаши мумкин.
Аввалроқ, ихчам iPhone 12 ва 13 мини сотуви ўзини оқламагач, Apple «мини» версиясини катта экранли «плюс» билан алмаштирди. Аммо бу моделлар ҳам фойдаланувчилар орасида, айниқса Pro моделларига нисбатан унчалик машҳур бўлмади, шунинг учун iPhone 16 Plus моделидан воз кечиш мантиқий кўринади.
Янги Apple смартфонларининг чиқарилишига ҳали кўп ойлар бор, бироқ тармоқда iPhone 16 ҳақида етарлича миш-мишлар тўпланиб қолган. Энг кўзга кўринган янгиланишлардан бири бу Pro моделлари дисплейининг катталашуви ва камерани бошқарувчи янги тугманинг пайдо бўлиши.
