Тамаш Шуйок Венгриянинг янги президенти этиб сайланди

67 ёшли Шуйок бу лавозимда можаро ортидан истеъфога чиққан Каталин Новак ўрнини эгаллайди.

Фото: AFP

Венгрия парламенти мамлакат Конституциявий суди раиси Тамаш Шуйокни президент лавозимига тайинлади. У 5 мартдан янги лавозимда фаолиятини бошлайди.

67 ёшли Шуйок ҳукмрон «Фидес» ва унинг коалиция бўйича ҳамкори Христиан-демократик халқ партиясидан номзод эди. У 2014 йилда Конституциявий суд аъзоси бўлди. 2016 йилда Конституциявий суд раиси лавозимига сайланди.

Венгрияда президент ваколатлари қонун билан чекланган. Уларнинг бир қисмидан фақат ҳукумат томонидан қўллаб-қувватлансагина фойдаланиш мумкин. Мамлакатда президент парламентдаги яшириш овоз бериш йўли орқали 5 йил муддатга сайланади.

Аввалроқ, Венгрия президенти Каталин Новак болаларга нисбатан жинсий зўравонликни яширганликда айбланган шахснинг авф этилиши билан боғлиқ можаро ортидан истеъфога чиққан эди. У 2022 йил март ойида президентлик фаолиятини бошлаган ва Венгрия тарихидаги биринчи президент аёл бўлган эди.