Европа Иттифоқи давлатлари, АҚШ, Британия, Канада ва бошқа давлатлар Россия Федерациясини Алексей Навалнийнинг «тўсатдан ва ҳайратланарли» ўлими бўйича мустақил тергов ўтказиш имкониятини таъминлашга чақирди.
Россия мухолифатчи сиёсатчиси Алексей Навалний колонияда вафот этгач, 40 дан ортиқ давлат фожиа ҳолатларини мустақил текширишга чақирди. Россия ҳукумати унинг тўсатдан ўлими юзасидан мустақил ва шаффоф халқаро тергов ўтказиш имкониятини таъминлаши керак, деди 4 март, душанба куни ЕИнинг Женевадаги халқаро ташкилотларда вакили Лотте Кнудсен.
БМТ Инсон ҳуқуқлари кенгашида сўзлаган у Навалнийнинг ўлими учун асосий жавобгарликни Россия раҳбарияти зиммасига юклади. «Россиядаги мухолифатчи сиёсатчи Алексей Навалнийнинг ўлимидан ғазабдамиз, бунинг учун асосий масъулият Россия раҳбарияти зиммасига тушади», — деди Кнудсен 43 давлат, жумладан, Европа Иттифоқи, АҚШ, Британия, Украина, Австралия, Янги Зеландия, Канада ва Норвегия номидан гапирар экан.
Дипломат сўзларига кўра, «Навалнийнинг кутилмаган ва ҳайратланарли ўлими Россияда кучайган ва тизимли репрессиялар яна бир белгисидир». У «фуқаролик жамиятининг тизимли равишда бостирилиши», шунингдек, Россияда ва хорижда сиёсий мухолифат репрессия қилинишидан чуқур хавотир билдирди.
Алексей Навалнийнинг ўлими
Узоқ муддатли қамоқ жазосига ҳукм қилинган Алексей Навалний 16 феврал куни Ямал-Ненец автоном округи Харп қишлоғидаги «Полярный волк» махсус режимли колониясида вафот этди. Унинг ўлими ҳақидаги ҳисоботда айтилишича, 47 ёшли сиёсатчи «табиий сабаблар» туфайли вафот этган. ФБК яратувчисининг тарафдорлари у ўлдирилган деб ҳисоблаяпти. Навалний қамоқда ўтирган вақтида 27 марта жазо камерасига жўнатилган.
Алексей Навалнийнинг жасади онаси Людмила Ивановнага фақат 24 феврал куни берилди. Бундан олдин у Навалний билан хайрлашмасдан яширин дафн маросимига розилик беришни талаб қилган Тергов қўмитасининг ултиматумидан шикоят қилган. Людмила Навалная бу талабни бажаришдан бош тортди.
Навалнийнинг дафн маросими 1 март куни Москвада, Борисов қабристонида бўлиб ўтди. Ҳибсга олиш таҳдидларига қарамай, минглаб одамлар сиёсатчи билан хайрлашиш учун келган. Дафн маросимидан бир неча кун ўтгач ҳам одамлар сиёсатчининг қабри олдига гул қўйиш ва у билан хайрлашиш учун навбатда турибди.
