Май ойидан бошлаб тўлиқсиз иш стажи билан пенсияга чиққанлар ва боқувчисини йўқотганлик пенсиясини олувчи меҳнатга қобилиятсиз оила аъзоси учун пенсиялар миқдори 621 минг сўмдан 648 минг сўмга етказилди.
Ўзбекистон президенти 30 апрел куни имзолаган фармон билан, айрим ҳужжатларга ўзгартишлар киритилди. Бу ҳақда Иқтисодиёт ва молия вазирлиги ҳузуридаги Пенсия жамғармаси хабар бермоқда.
Фармонга кўра, 2024 йилнинг 1 майидан бошлаб минимал истеъмол харажатлари 648 минг сўм деб белгилангани сабабли қуйидаги пенсияларнинг миқдори ушбу суммага тенглаштирилди:
- иш стажи тўлиқсиз чоғдаги ёшга доир пенсиянинг энг кам миқдори;
- боқувчисини йўқотганлик пенсияси олувчи бир нафар меҳнатга қобилиятсиз оила аъзоси учун пенсиянинг энг кам миқдори.
“Бунинг натижасида 751 минг нафар ёшга доир ва 110 минг нафар боқувчисини йўқотганлик пенсияларини олувчи фуқароларнинг пенсиялари минимал истеъмол харажатлари миқдорига етказилади.
Пенсияларни ошириш учун Пенсия жамғармаси маблағлари ҳисобидан 180 млрд сўм қўшимча маблағлар ажратилади”, – дейилади Пенсия жамғармаси хабарида.
Пенсиялар май ойидан бошлаб ошган миқдорда тўланади.
Эслатиб ўтамиз, минимал истеъмол харажатлари электр энергияси ва табиий газ тарифлари оширилиши муносабати билан 1 майдан эътиборан 1 киши учун 1 ойга 621 минг сўмдан 648 минг сўмга (4,4 фоизга) оширилган эди.
