ЕИда маймунчечак вируси бўйича таҳдид даражаси оширилди

Касалликлар олдини олиш ва назорат қилиш бўйича Европа маркази (ECDC) касалланиш ҳолатлари «паст»дан «ўртача»гача бўлган ҳудудларда аҳоли ва саёҳатчилар учун mpox вируси инфекцияси (илгари маймунчечак деб аталган) хавфини оширди. Бу ҳақда 16 август, жума куни Стокҳолмда жойлашган ECDC маълум қилди. 

«Европа ва Африка ўртасидаги яқин алоқалар туфайли биз вируснинг Clade 1 штамми билан инфекциянинг янги импорт ҳолатларига тайёр бўлишимиз керак», дея идора бошлиғи Памела Ренди Вагнернинг сўзларидан иқтибос келтирди Reuters. 

Швециядаги беморда mpox вируси инфекцияси 

15 август куни Жаҳон соғлиқни сақлаш ташкилоти (ЖССТ) Швецияда mpox вирусининг янги штамми - Clade Ib билан касалланган беморни тасдиқлади ва инфекция юқиши Африкада содир бўлганлигини таъкидлади.

ЖССТ илгари Африкада вирус тарқалиши учун энг юқори огоҳлантириш даражасини эълон қилиб, эпидемияни «соғлиқни сақлаш учун халқаро аҳамиятга молик фавқулодда ҳолат» деб атаганди. 

Mpox вируси ҳақида 

Mpox вируси касал ҳайвонлардан одамларга, шунингдек, жисмоний алоқа орқали одамдан одамга юқади. Касаллик белгилари орасида иситма, мушак оғриғи ва йирингли пуфакчалар бўлган тери тошмаси бор.

Германия соғлиқни сақлаш вазири Карл Лаутербах Швецияда mpox инфекцияси аниқланганини изоҳлар экан, бу вирус ҳозирда Германия аҳолиси учун жиддий хавф туғдирмаслигини таъкидлади. «Швециядаги ҳолат Германия ва Европа учун хавфни баҳолашда ҳеч нарсани ўзгартирмайди», деди Лаутербах.

Африкада mpox касаллигининг тарқалиши 

Илгари mpox ҳақида хабар берилмаган Бурунди, Кения, Руанда ва Угандада 15 августгача 1b вариантининг 90 та ҳолати аниқланган, у аввалги вариантга қараганда оғирроқ ва кўпроқ ўлимга сабаб бўлади. ЖССТ 14 август куни Конго Демократик Республикасида 14 мингдан ортиқ касалланганлар рўйхатга олингани, 524 киши вафот этганини билдирди. 2023 йил январ ойидан буён мамлакатда 27 мингта инфекция ҳолати қайд этилган, 1100 дан ортиқ ҳолат, асосан, болалар ўртасида ўлим билан якунланган. 

Жорий йилда Африканинг 13 давлатида жами 17 мингта mpox инфекцияси ҳолати қайд этилди, бу 2023 йилнинг шу даврига нисбатан 2,6 баравар кўп, деб хабар бермоқда Reuters. 

2022 йилнинг ёзида ЖССТ маймунчечак эпидемиясини «соғлиқни сақлаш учун халқаро аҳамиятга молик фавқулодда ҳолат» деб эълон қилди. Ўшанда дунёнинг 75 та мамлакат ва ҳудудларида 2b вирус вариантини юқтирганлар сони 16 мингдан ошган эди. Кўпгина инфекция ҳолатлари Европа ва Америкада, асосан, эркаклар орасида аниқланган. Фавқулодда ҳолат 2023 йил май ойида бекор қилинган.