Президент махсус вакили БМТ жиноятчиликка қарши курашиш бошқармаси вакили билан учрашди

Ўзбекистон президентининг Афғонистон бўйича махсус вакили Исматулла Эргашев БМТнинг Гиёҳванд моддалар ва жиноятчиликка қарши курашиш бошқармасининг Афғонистон, Марказий Осиё, Эрон ва Покистон бўйича минтақавий вакили Оливер Штолпе билан учрашди.

Фото: "Дунё" АА

ТИВ маълумотига кўра, суҳбат чоғида ноқонуний гиёҳванд моддаларни истеъмол қилиш ва савдосини камайтириш, уюшган жиноятчиликка қарши курашиш, коррупциянинг олдини олиш, терроризмга қарши курашишда минтақа давлатларининг тегишли идоралари билан ҳамкорликда ишларни фаоллаштириш масалалари муҳокама қилинди.

Оливер Штолпе Ўзбекистоннинг Афғонистон бўйича минтақавий яхлит позициясини ривожлантириш, мамлакатда узоқ муддатли тинчлик ва барқарорлик ўрнатиш, шунингдек, афғон халқига гуманитар ёрдам кўрсатиш борасидаги саъй-ҳаракатларини юқори баҳолади.

Гиёҳванд моддаларнинг ноқонуний айланиши ва жиноятчиликка қарши курашишнинг долзарб ва истиқболли йўналишлари бўйича доимий алоқаларни давом эттириш ва фикр алмашиш бўйича келишувга эришилди.

Тайёрлаган: Отабек Матназаров

#БМТ #Исматулла Эргашев