Германия визаси учун аризалар электрон форматга ўтказилди

Германия ТИВ виза учун аризаларни энди онлайн тарзда топшириш мумкинлигини маълум қилди. Порталда бир қатор давлатлар, хусусан, РФ, Украина, Қозоғистон учун бундай имконият йўқ. Ўзбекистон фуқаролари учун эса шундай имкон тақдим этилган.

Фото: Depositphotos

Германия Ташқи ишлар вазирлиги (ТИВ) узоқ муддатли немис миллий визаларини олиш учун аризаларни электрон онлайн кўриб чиқиш порталини ишга туширди. Бу ҳақда 1 январ, чоршанба куни бошқарма сайтида маълум қилинди.

Пресс-релизда таъкидланганидек, ушбу лойиҳа икки йил аввал тест форматида ишга туширилган. «Бу энди дунё бўйлаб 167 та виза идораларида рақамли ҳақиқатга айланмоқда. Миллий виза 28 тоифада рақамли шаклда қўлланиши мумкин», дейилади хабарда.

ГФР ТИВ раҳбари Бербок: Янги визалар - «маъмурий инқилоб»

Ташқи ишлар вазири Анналена Бербокнинг айтишича, инновациядан асосий мақсад Германияга бутун дунёдан малакали мутахассисларни жалб этишдир. «Бундай пайтларда биз узоқ вақт меъёрий ҳужжатларни расмийлаштириш ва ундан ҳам узоқроқ кутиш туфайли энг яхши одамларнинг мамлакатимизда ишлашига тўсқинлик қила олмаймиз», деди вазир.

«Охирги 2,5 йил ичида биз мавжуд виза жараёнини кенг кўламли, узоқ вақтдан бери кечиктирилган таркибий ислоҳот билан ўзгартирдик. Ва энди биз ниҳоят Европанинг энг замонавий иммиграция қонунини рақамли асрга олиб чиқмоқдамиз. Электрон виза жараёни - ҳақиқий маъмурий инқилоб, бу Германияни бизнес қилиш жойи сифатида мустаҳкамлайди, буни бизнес ва йирик корпорациялар узоқ вақтдан бери талаб қилмоқда», - деди Бербок.

Онлайн ариза бериш имкони Россия, Украина, Қозоғистонда мавжуд эмас

DW мухбири 1 январ, чоршанба куни Германия Ташқи ишлар вазирлигининг янги порталида текширганидек, электрон ариза бериш имкони барча мамлакатларда ҳам мавжуд эмас.

Аввалига фойдаланувчидан керакли виза турини танлаш сўралади. Рўйхатда қисқа муддатли Шенген туристик визалари йўқ, фақат узоқ муддатли миллий визалар бор. Масалан, иш ёки уни қидириш, ўқиш, оила бирлашуви учун.

Кейин истиқомат қиладиган мамлакатни ва маълум бир шаҳардаги элчихона ёки консулликни танлаш сўралади. Баъзи мамлакатларни танлашда «онлайн ариза мавжуд эмас» деган хабар пайдо бўлади. Бу, масалан, Россия, Украина, Қозоғистон, Гуржистон ва Тожикистонга тегишли.

Шу билан бирга, онлайн ариза бериш имкони Беларус, Арманистон, Озарбойжон, Молдова, Литва, Латвия, Эстония, Ўзбекистон, Қирғизистон, Туркманистон, шунингдек, Исроил ва АҚШда мавжуд.

DW таҳририяти Германия ташқи ишлар вазирлигига тегишли сўров юборди.

#Германия #виза