Хитойда дунёдаги энг катта ГАЭС ишга туширилди

Хитой шимолидаги Хэбэй провинциясида жойлашган «Фэннин» гидроаккумулятор электр станция (ГАЭС) ўтган йилнинг охирида тўлиқ ишга туширилди, деб хабар беради «Синхуа» агентлиги.

China National State Grid операторининг маълум қилишича, «Фэннин» дунёдаги ГАЭСлар ичида энг йириги ҳисобланади.

«Фэннин»нинг ўрнатилган қуввати 3,6 миллион kW·hʼга тенг. У йилига 6,61 миллиард kW·h электр энергияси ишлаб чиқаришга мўлжалланган.

Таъкидланишича, 2021 йилда энергоблокларининг биринчи қисми ишга туширилганидан бери электр станцияси 8,62 миллиард kW·h электр энергияси ишлаб чиқарган.

Қайд этилишича, «Фэннин» йилига 408,8 минг тонна кўмир эквивалентидаги шартли ёнилғини тежаш ва атмосферага 1,2 миллион тонна карбонат ангидрид гази чиқарилишини қисқартиришга ёрдам беради. «Бу мамлакатнинг энергосамарадорлик ва экологик барқарорлик соҳасидаги мақсадларга эришишига муҳим ҳисса қўшади», — дейилади хабарда.

Эслатиб ўтамиз, 2024 йил март ойида Тошкентда гидроэнергетика форуми бўлиб ўтган, унда “Ўзбекгидроэнерго” масъули Нодирбек Акчабоев Ўзбекистонда 4 та гидроаккумулятор электр станциялар қурилишини айтганди. Унинг сўзларига кўра, Марказий Осиёдаги биринчи бундай лойиҳалар Жиззах, Тошкент вилоятлари ва Қорақалпоғистон Республикасида бўлиши, уларнинг умумий қуввати 1600 MWʼни ташкил этиши кўзда тутилган.