Тошкентда 25,5 гектар ер участкаси 40,4 млн долларга сотилди

Тошкент шаҳри Мирзо Улуғбек тумани Алишеробод маҳалласи ҳудудидаги 25,52 гектар ер участкаси кимошди савдоси орқали сотилди.

E-аукцион платформасида жойлаштирилган маълумотга кўра, электрон савдода 2 та талабгор иштирок этиб, уларнинг бир нафари томонидан нарх таклифи киритилган. Натижада “Valid Trading” компаниясининг 522,7 миллиард сўмлик ягона таклифи ғолиб деб топилган.

Мирзо Улуғбек тумани ҳокимининг 2024 йил 17 декабрдаги қарорида ер участкасидан савдо ва маиший хизмат кўрсатиш, офис, меҳмонхона, умумий овқатланиш хизматлари, ўрта қаватли турар жой биноларини ташкил қилиш учун фойдаланиш кўзда тутилган.

Ер участкаси харидорга 49 йилга ижарага берилади. Агар “Valid Trading” компанияси 15 кун ичида тўлиқ тўловни амалга оширса, 20 фоиз чегирмага эга бўлади. Энг камида 35 фоиз дастлабки тўлов билан уч йил давомида бўлиб-бўлиб тўлашга ҳам харид қилиш имконияти бор. Лот ҳужжатларида ер участкаси ҳудудидаги дарахтлар, буталар ва бошқа ўсимликларни ноқонуний кесиш, илдизи билан суғориш, шикастлаш, йўқ қилиш ёки қайта экиш тақиқлангани кўрсатилган.

Корхона ва ташкилотларнинг ягона давлат реестрига кўра, харидор “Valid Trading” 2019 йил 8 февралда Тошкент вилоятида рўйхатга олинган. Жорий устав фонди – 1,04 млрд сўм. Фаолият йўналиши – ихтисослашмаган улгуржи савдо.

Компаниянинг 100 фоиз улуши Абдувалиев Ворис Борий ўғлига тегишли.