Энгелсда дронлар ҳужумидан кейин фавқулодда ҳолат эълон қилинди

Саратов областининг Энгелс шаҳрида 8 январ, чоршанба куни эрталаб Росрезерв нефт базасига Украина учувчисиз учоқлари томонидан берилган зарбадан сўнг ёнғин ҳудуди кечга яқин кучайган, шу муносабат билан расмийлар фавқулодда ҳолат эълон қилди. Бу ҳақда минтақа губернатори Роман Бусаргин маълум қилди. Унинг Telegramʼдаги хабарида «саноат корхонаси» зарар кўргани ҳақида сўз боради.

Бусаргиннинг сўзларига кўра, Фавқулодда вазиятлар вазирлиги ёнғин хавфсизлиги хизматининг икки ходими ҳалок бўлган, бир ўт ўчирувчи жароҳатланган. Аввалроқ у қурбонлар йўқлиги ва «ёнғинни ўчириш учун етарли куч ва воситалар мавжудлигини» ёзган эди.

Губернаторнинг таъкидлашича, дронлар ҳаво ҳужумидан мудофаа кучлари томонидан уриб туширилган, бироқ у таъкидлаганидек, «Энгелсдаги саноат объектига дрон парчалари қулаган». Интернетда ёнғин акс этган сурат ва видеолар пайдо бўлди.

Кейинчалик ёрқин чақнаш акс этган видео эълон қилинди, шундан сўнг ёнғин янада кучайган.

Россиянинг Энгелсида дронлар нефт базасига ҳужум қилди

Саратов областининг Энгелс шаҳрида 8 январга ўтар кечаси дрон ҳужумидан кейин портлашлар содир бўлди. Губернатор Роман Бусаргин Саратов ва Энгелс катта ҳужумга учрагани ва уриб туширилган учувчисиз учоқларнинг қолдиқлари «саноат объекти»га тушиб, у «зарар» кўрганини айтди, аммо ҳеч ким жабрланмаган.

Россия Telegram-каналлари хабарига кўра, гап дрон зарбаси натижасида кучли ёнғин чиққан нефт базаси ҳақида кетмоқда.

"ВЧК-ОГПУ" каналига кўра, дастлабки маълумотларга кўра, Энгелсдаги нефт базасига ҳужумда 30 дан ортиқ дрон иштирок этган.

Декабр ойи ўрталарида Саратов губернатори Бусаргин минтақадаги ҳарбий аэродромга учувчисиз учоқ томонидан ҳужум қилинганини билдирди, лекин у қайси аэродром ҳақида гапираётганига аниқлик киритмади. Шу билан бирга, Саратов яқинидаги Энгелсда Россия ҳаво-космик кучларининг «Энгельс-2» авиабазаси жойлашган бўлиб, унда стратегик бомбардимончилар мавжуд. Украина қуролли кучлари Энгелсдаги самолётлар Украина ҳудуди узра ракеталарни учиришини бир неча бор таъкидлаган.