Россия Оқтов яқинидаги авиаҳалокатнинг холисона тергов қилинишидан манфаатдор — Песков

Россия Azerbaijan Airlines (AZAL) авиакомпанияси самолётининг Оқтов шаҳри яқинида ҳалокатга учраши юзасидан мутлақо объектив ва холис тергов ўтказилишидан манфаатдор. Бу ҳақда Россия президенти матбуот котиби Дмитрий Песков маълум қилди.

«Тергов идораларига керакли кўрсатмалар берилди <…> Биз ушбу ҳалокат сабабларини аниқлаш учун мутлақо объектив ва холис тергов ўтказилишидан манфаатдормиз», деди Кремл вакили журналистларга.

Песков авиаҳалокатдан сўнг Россия президенти Владимир Путин ва Озарбойжон президенти Илҳом Алиев икки марта телефон орқали гаплашганини, Россия раҳбари узр сўраб, таассуф сўзларини айтганини эслатди. «Ушбу ҳалокат сабабларини ўрганишда барча зарур ёрдам ва ҳамкорлик кўрсатилмоқда», деди Кремл вакили.

29 декабр куни Озарбойжон президенти Илҳом Алиев Озарбойжон телевидениесига интервю бериб, Россия AZAL самолётининг Оқтовда қулаши сабабларини «бости-бости» қилмоқчи бўлганидан афсусда эканини айтди. Унинг таъкидлашича, «самолёт атайлаб уриб туширилмагани аниқ», лекин Россия томони воқеадаги айбини зудлик билан тан олиб, Озарбойжондан кечирим сўраши керак эди. «Афсуски, дастлабки уч кун давомида биз Россиядан уйдирма версиялардан бошқа ҳеч нарса эшитмадик», деб хулоса қилди Алиев.

7 январ куни Озарбойжон раҳбари Москвадан айбни расман ўз зиммасига олишни, айбдорларни жазолашни ҳамда товон пули тўлашни талаб қилаётганини яна бир бор таъкидлади.