Покистонда 5 қаватли бино қулаб тушди. Қурбонлар бор

Покистоннинг Карачи шаҳрида кўп қаватли турар жой биноси қулаб тушиши оқибатида ҳалок бўлганлар сони 17 кишига етди, деб хабар беради Xunhua агентлиги.

Давлат қутқарув хизмати вакилининг сўзларига кўра, ҳаёт аломатларини аниқлашга мўлжалланган қурилмалар вайроналар остида қолган камида 10 киши тирик эканини кўрсатмоқда.

Қутқарувчилар бригадалари содир бўлган воқеа тўғрисида хабар олган заҳоти етиб келган, 100 дан ортиқ ходим омон қолган инсонлар ва ҳалок бўлганлар жасадини чиқариб олиш операциясида иштирок этмоқда.

Гувоҳларнинг таъкидлашича, бинода бир неча соат давомида силкинишлар кузатилган, аҳоли эса буни зилзила деб ўйлаган.

Карачи мэри Муртоза Ваҳобнинг айтишича, қулаб тушган бино олдинроқ «хавфли» дея тан олинган ва у ерда истиқомат қилувчи аҳолига бинодан кўчиш буюрилган.

Беш қаватли бино аҳоли гавжум Лиари туманида жойлашган бўлиб, 4 июль куни қулаб тушган. Расмийлар ҳолат бўйича тергов бошлаган ва яқин атрофидаги бинолар ҳам хавфсизлик нуқтаи назаридан текширилмоқда.