Трамп Россия ва Хитойни «бир-бирига табиий душман» деди

Россия ва Хитой - табиий душманлар, деди АҚШ президенти Доналд Трамп Fox News телеканалига берган интервьюсида.

Унинг қўшимча қилишича, АҚШ собиқ президенти Жо Байден «ақлга сиғмайдиган» иш қилиб, Россия ва Хитойни яқинлашишига сабабчи бўлган. Трамп сўзларига кўра, бунга Байденнинг ўтмишдоши Барак Обама ҳам ҳисса қўшган, республикачининг ўзи эса воқеаларнинг бундай ривожланишини «тўхтатган».

Трампнинг таъкидлашича, тарихий тажрибадан келиб чиқиб, бу икки давлатнинг яқинлашувига йўл қўйиб бўлмас эди, чунки улар «бир-бирига табиий душманлардир». Чунки, Россия «улкан ҳудудларга эга», Хитой эса «ерларга муҳтож бўлган улкан аҳолига эга».

Республикачининг таъкидлашича, бу давлатлар бир-бирига яқинлашиб олган. Шу билан бирга, Трамп бундай динамика давом этишига шубҳа билдирди, чунки Россия ва Хитой ўртасида, унинг сўзларига кўра, «табиий келишмовчиликлар» мавжуд.

Трамп 2023 йилда ҳам Байден сиёсати Россия билан Хитойнинг яқинлашишига олиб келганини айтган эди. Унинг сўзларига кўра, «Байден маъмурияти Россияни тўғридан-тўғри Хитойнинг қўлига итариб юборган», бу эса номақбул. Трампнинг қўшимча қилишича, ҳозир икки давлат «катта чиройли иттифоққа» эга.

Шу билан бирга, Трамп Байденнинг айнан қайси ҳаракатлари бундай оқибатга олиб келганига аниқлик киритмади. Бир йил ўтиб, у сайловолди митингида, агар АҚШ ақлли президент томонидан бошқарилса, Россия ва Хитой Қўшма Штатларга душман бўлишни тўхтатишини айтди.

«Бизнинг ташқи душманларимиз бор: Хитой, Россия, Шимолий Корея. Аслида эса улар душман эмас. Агар сизда ақлли президент бўлса, улар душман эмас», деди Трамп.