Украина учун хавфсизлик кафолатларида АҚШ минимал рол ўйнайди

Пентагоннинг сиёсий масалалар бўйича юқори мартабали вакили иттифоқчиларнинг кичик гуруҳига АҚШ Украинага ҳар қандай хавфсизлик кафолатларини беришда минимал рол ўйнашни режалаштираётганини айтди. Бу ҳақда Politico ёзди.

Қайд этилишича, бу Европа Украинада барқарор тинчликни сақлаш юкини ўз зиммасига олишига тўғри келишининг энг аниқ белгиларидан биридир.

Нашр маълумотларига кўра, Буюк Британия, Франция, Германия ва Финляндия мудофаа идоралари раҳбарлари Америка томонидан Украинани Россия билан тинчлик келишувига эришишда қўллаб-қувватлаш учун қандай қўшинлар ва ҳаво кучлари билан таъминлаши ҳақида маълумот беришни сўраган.

Расмийларнинг айтишича, ушбу учрашув ва НАТО етакчиларининг 20 март куни шошилинч равишда ташкил этилган яна бир учрашуви иттифоқчиларда АҚШ президенти Доналд Трамп Россия босқинини якунлаганидан кейин узоқ муддатли тинчликни таъминлашда Европага таяниши борасидаги хавотирларни кучайтирди.

«Буни жойларда айнан Европа амалга ошириши тобора аниқ бўлиб бормоқда. АҚШ ҳеч нарсага тўлиқ содиқ эмас», деди музокаралар жараёнидан хабардор бўлган НАТО дипломати.

Шу билан бирга, баъзи Европа расмийлари бу ҳафтадаги учрашувлар мураккаб музокаралар ва «савдолар» сериясининг «биринчи тўлқини» экани ҳақида огоҳлантирди, чунки Европа тинчликни сақлаш бўйича кенг кўламли ва қимматга тушадиган вазифага дуч келмоқда.

Оқ уйда бўлиб ўтган учрашувда иштирок этган НАТО бош котиби Марк Рютте алянсга аъзо 32 давлатни музокаралар ҳақида хабардор қилган ва хавфсизлик кафолатларини умумий тарзда муҳокама этишни бошлаган.

18 август куни Трамп АҚШ қўшинларини Украинага юборишга тайёрлигини маълум қилди. Аммо бир кун ўтгач, у ўз ниятидан воз кечиб, бунинг ўрнига Европа қўшинларига ҳаводан ёрдам беришга тайёрлигини айтди.