КХДР Ким Чен Ин иштирокида янги ракеталарни синовдан ўтказди

Шимолий Корея раҳбари Ким Чен Ин КХДРда янги ҳаво ҳужумидан мудофаа ракеталарининг синовдан ўтказилишини шахсан ўзи назорат қилди, деб хабар берди Корея марказий телеграф агентлиги (КМТА) 24 август, якшанба куни. Манбага кўра, мамлакат ҳукмдори бир кун аввал синовларда иштирок этган. Шунингдек, улар янги ҳаво ҳужумидан мудофаа тизимларининг жанговар хусусиятларини баҳолаган бир қанча юқори мартабали ҳарбий амалдорлар иштирокида ўтказилди, дейилади хабарда.

Пхенян зенит ракеталарининг янги синовлари Шимолий Кореянинг мудофаа қобилиятини мустаҳкамлаш истагини намойиш этиш, шунингдек, АҚШ ва Жанубий Кореяга ҳаво ҳудудини ҳимоя қилишга тайёрлиги ҳақида сигнал юбориш учун мўлжалланган эди.

«Синовлар давомида икки турдаги снарядларнинг технологик характеристикалари турли ҳаво нишонларини уриш учун жуда мос эканлиги алоҳида қайд этилди», — дея маълум қилди КМТА. Давлат агентлиги ҳисоботида ракеталар турлари ва синовлар ўтказилган жой ҳақида батафсил маълумотлар йўқ.

АҚШ ва Жанубий Корея ўртасида 18 августдан буён ўтказиб келинаётган йиллик қўшма ҳарбий машғулотлар ҳамда ушбу давлатлар президентларининг бўлажак саммити фонида сўнгги кунларда Корея яриморолида кескинлик кучайган.