Исроилда гаровга олинганларнинг яқинлари ҲАМАС билан келишувни талаб қилмоқда

ҲАМАС қўлида қолган исроиллик гаровга олинганларнинг яқинлари ҳукуматнинг олти аъзоси уйига келиб, Ғазо секторидаги урушни тўхтатишни ва «ҳаммани уйига олиб келишни» талаб қилди.

Фото: Mostafa Alkharouf/Anadolu

Dpa хабарига кўра, ҲАМАС ташкилоти қўлида қолган исроиллик гаровга олинганларнинг қариндошлари Исроил ҳукуматининг олти нафар аъзоси, жумладан, мудофаа вазири Исраэл Кац ва ташқи ишлар вазири Гидеон Саарнинг уйи яқинида норозилик намойиши ўтказди.

Намойишчилар вазирларни Ғазо секторида ўт очишни тўхтатиш режимини ўрнатишга ва гаровга олинганларни озод қилиш учун ҲАМАС жангчилари билан келишувга эришишга чақирди. «Биз кейинги кечикишларни кечирмаймиз», — дея уларнинг баёнотидан иқтибос келтиради dpa. «Халқни тингланг: бу урушни тўхтатинг ва барчани уйга олиб келинг».

18 август куни AFP ҲАМАСдаги манбаларига таяниб, ҳаракат Ғазо секторида ўт очишни тўхтатиш бўйича янги таклифни ҳеч қандай тузатишларсиз қабул қилгани ҳақида хабар берди. Агентлик манбаларидан бирининг таъкидлашича, бу 60 кунлик оташкесим ва ҲАМАС томонидан гаровга олинганларни икки партияда озод қилишдан иборат эди.

Афтидан, гаровга олинган 50 нафар исроилликдан 20 нафари ҳозир тирик. Исроил раҳбарияти ҳозирча ўт очишни тўхтатиш таклифига рози эканлигини расман тасдиқлагани йўқ.

Тайёрлаган: Отабек Матназаров

#Исроил #ҲАМАС

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.