“Истеъдодлар учун уруш” – Meta ва xAI сунъий интеллект даҳоларини талашмоқда

Марк Цукербергнинг Meta компанияси сунъий интеллект соҳасидаги энг яхши тадқиқотчиларини жамоада олиб қолиш учун 250 млн долларгача бўлган ретеншн-бонуслар (компанияни ташлаб кетмаганлик учун рағбатлантириш) таклиф қилмоқда.

Шунга қарамай, Yahoo Finance'нинг ёзишича, Илон Маскка қарашли xAI йил бошидан бери Meta'нинг СИ бўлимидан 14 нафар муҳандисни ўзига жалб қилишни уддалаган.

Илон Маск яхши кадрларни ўзига жалб қилишда ўзига хос усул қўллаяпти. У xAI компаниясида “гипер-меритократик” муҳит шакллантирганини айтади: бу муҳитда яхшироқ ишлаганлар яхшироқ маош ва кўпроқ акциялар олади.

Манбага кўра, xAI'га ўтган муҳандислар қизғин стартап муҳитига тушиб қолишади: энг илғор кадрлардан таркиб топган жамоа “энг замонавий” деб таъриф бериладиган лойиҳалар устида ҳафтасига 7 кун ишлайди.

Илон Маск моддий манфаатдорликдан ҳам кўра, кўпроқ буюк ўзгаришлар муаллифи бўлишга илҳомлантиришга уринмоқда. У катта бонуслардан воз кечиб xAI'га келаётган муҳандислар оқимини ўзи танлаган ёндашувнинг тўғрилига исбот сифатида кўряпти. Яъни унингча, етук кадрларни кўп миллион долларлик пакетлар эмас, “буюк иш қилиш” ғояси кўпроқ ўзига жалб қиляпти.

Шу билан бирга, СИ тадқиқотчилари миграцияси ҳақида Илон Маск келтирган рақамларни Meta рад этади. Цукерберг қўл остидаги компания ўзининг инфратузилмавий устунлиги ва тадқиқотчиларга мустақиллик бериши билан мақтанади.

Ўз навбатида, Anthropic бош директори Дарио Амодеи Meta'нинг компенсация стратегияси ҳақида огоҳлантириб, ҳаддан ташқари катта бонуслар жамоа ичида адолатсизлик ва “токсик атмосфера” келтириб чиқаришини айтади. Унинг сўзларига кўра, “мақсадни пулга сотиб олиб бўлмайди”. Жамоада кимлардир худди лотерея ютгандек катта маблағ олса-ю, қолганлар Кремний водийсидаги ўртача ойликка ишласа, бу муҳит бузилишига олиб келади.

Шу тариқа, СИ соҳасидаги бу истеъдодлар уруши технологик маданиятдаги асосий фарқни кўрсатди:

• Meta – дарҳол молиявий барқарорлик ва кучли инфратузилмани таклиф қилади.
• xAI – акциялар, чуқур интеграция ва “дунёни ўзгартириши мумкин бўлган нарсани нолдан қуриш имконияти”ни ваъда қилмоқда.