Меркел: Қочқинларни қабул қилиш қарорига муқобил вариант бўлмаганди

Германия ҳукуматининг 2015 йилда Яқин Шарқдан бир неча юз минг қочқинни қабул қилиш қарорига «муқобил вариант йўқ эди», деди Германия ҳукуматининг собиқ раҳбари Ангела Меркел 27 август, чоршанба куни Augsburger Allgemeine газетаси томонидан ташкил этилган оқшомда. «Биз чегарага сув пуркагичлар билан борармидик? Ўшанда қадриятларимизга нима бўларди?» — деди Меркел 2015 йилда урушдан қочган юз минглаб Сурия фуқароларини қабул қилиш қарори ҳақида гапирар экан.

Унинг сўзларига кўра, Берлиннинг миграция сиёсатида «эътибордан четда қолдириб бўлмайдиган камчиликлар мавжуд», бироқ «келганларнинг кўпчилиги ҳам нимагадир эришган». «Албатта, жараён ҳали якунлангани йўқ, кўп нарса яхшиланди, лекин ҳали қиладиган ишларимиз кўп», — деди Меркел. У 2015 йилда Германияни тарк этишга мажбур бўладиганларни чиқариб юбориш қанчалик қийин бўлишини олдиндан кўра билмаганини тан олди. Миграция муаммоларига Европа даражасида биргаликда қарши туриш керак ва «бизнинг Европа Иттифоқимиз заифлашмаслиги керак, чунки биз умумий ечим топа олмаяпмиз», деди собиқ канцлер.

Ўн минглаб қочқинлар 2015 йилнинг ёзида Германияга «Болқон йўли» деб аталган йўлак орқали кириб келган. Ўша йили мамлакатга йўл олган муҳожирларнинг умумий сони 800 минг кишини ташкил қилган. Христиан-демократик иттифоқнинг ўша пайтдаги раиси ва Германия канцлери Ангела Меркел кўпчилиги Суриядан бўлган янги келганларга мамлакат киришга рухсат беришни буюриб, «Биз буни уддалаймиз» (Wir schaffen das), дея маълум қилганди.