Мерц: Россия Путин-Зеленский учрашувигача вақтни чўзмоқда

Трамп айтган Зеленский ва Путин учрашуви бўлиб ўтмаса, Ғарб янги санкцияларга мурожаат қилишга мажбур бўлади. Европа Иттифоқи аллақачон улар устида ишламоқда, деди Германия канцлери.

Фото: Tobias Schwarz/AFP/Getty Images

Украинадаги вазиятни тинч йўл билан ҳал қилиш йўлида Москва Россия президенти Владимир Путин ва Украина президенти Володимир Зеленскийнинг учрашувини маъқуллашни маълум шартлар билан боғлаб, «кечиктириш стратегиясига» мурожаат қилмоқда. Бундай фикрни Германия канцлери Фридрих Мерц Берлинда Канада бош вазири Марк Карни билан қўшма матбуот анжумани чоғида билдирди.

«Путин бу учрашувни Украина нуқтайи назаридан ҳам, бизнинг шахсий нуқтайи назаримиздан ҳам, мутлақо қабул қилиб бўлмайдиган дастлабки шартлар билан боғлашни тўғри деб ҳисоблайди», — деди Германия ҳукумати раҳбари.

АҚШ президенти Доналд Трамп Владимир Путин билан Аляскадаги учрашуви ва ундан сўнг Вашингтонда Володимир Зеленский ва Европа етакчилари билан бўлиб ўтган учрашувидан сўнг, тинч йўл билан келишув ечимига эришиш мумкинлигини аниқ айтди, деб хабар беради dpa агентлиги. Шу билан бирга, яқин икки ҳафта ичида Путин ва Зеленскийнинг шахсий учрашуви бўлиб ўтиши мумкинлиги айтилганди. Бироқ, бу муддат тез орада тугайди.

Тайёрлаган: Отабек Матназаров

#Украина #Россия #Фридрих Мерц #Марк Карни