“150 минг сўм учун урди” – Навоийда меҳмонхона эшик оғаси калтакланди

Навоий шаҳридаги Tinchlik Plaza меҳмонхонасида эшик оғаси бўлиб ишловчи 21 ёшли йигит мижоз томонидан калтакланди. Ҳолат ярим тунда, меҳмонхона ҳовлисида “PREZIDENT SOVG’ASI” деб ёзилган машина олдида содир бўлган. Ушбу машина паралимпиада чемпиони Элбек Султоновга тегишли экани маълум бўлди. Эшик оғасини спортчи билан бирга келган шахс урган.

{Yii::t(}

Ўтказиб юбориш 6s

Ўтказиб юбориш

Навоий шаҳридаги Tinchlik Plaza меҳмонхонаси ходими мижоз томонидан калтакланди. Kun.uz’га ушбу ҳолат акс этган видеолавҳа келиб тушди.

Видеолавҳада кўринишича, жанжал 21 август куни ярим тунда меҳмонхона ҳовлисида, “PREZIDENT SOVG’ASI” деб ёзилган машина олдида содир бўлган. Меҳмонхона ходими, 2004 йилда туғилган М.У. мижоз билан суҳбатлашиб турган, уларнинг олдига машинадан паралимпиада чемпиони Элбек Султонов тушиб келган. Шунда бояги шахс кутилмаганда М.У.нинг юз қисмига зарба берган. Йигит зарба кучидан ерга йиқилиб қолган.

Kun.uz М.У. билан суҳбатлашди. Унинг таъкидлашича, жанжалга 150 минг сўм пул сабаб бўлган.

“Меҳмонхонада эшик оғаси бўлиб ишлайман. Ўша куни спортчи Элбек Султонов ва унинг шериги, кейинчалик билишимча Сардор исмли йигит ресторанга мижоз сифатида келишганди. Улар чиқишаётганда официант менга “Буларга касса кўрсатиб юборинг, 150 минг сўм тўловлари бор”, деди. Улар ташқарига чиқишди, кетидан чиқдим. Ҳозир банк картасига ташлаб берамиз деди, кутиб турдим, аммо официант чиқавермади. Шунда улар кетамизга тушишди. Официант чиқиб, орани очмагунча кутиб туришим керак эди. Жанжал шундан чиқди. Сардор кутилмаганда уриб ташлади”, дейди йигит.

М.У.нинг қўшимча қилишича, у қарийб 10 кунга яқин шифохонада ётиб, даволанган. Бироқ ушбу даврда урган йигит келиб кечирим сўрамаган. Ҳолат акс этган видео тармоқларда тарқала бошлагач, шунингдек, олиб борилаётган тергов ҳаракатлари ортидан зўравон М.У.нинг уйига бориб, ота-онасидан кечирим сўраган.

“Меҳмонхонада бирга ишлайдиган йигитлар тез ёрдамга хабар беришган. Тез ёрдан келгунича урган шахслар қочиб кетган. М.У.нинг эса аҳволи оғирлашган. Ҳасан исмли ҳамкасби Республика шошилинч тиббий ёрдам илмий маркази Навоий филиалига олиб борган. Навбатчи шифокор 1-2 та дори-дармон қилиб, жўнатиб юборган. Эртаси куни яна аҳволи оғирлашган ва ота-онаси қайта Республика шошилинч тиббий ёрдам илмий маркази Навоий филиалига олиб борган. У ерда нейрохирург кўриб, ИИБга хабар берган. Бу орада урган йигитнинг шериги, яъни спортчи келиб, шифокор билан гаплашиб кетган. М.У. душанба куни “Бўйин юмшоқ тўқималари лат ейиши. Астено-невротик синдром” ташхиси билан чиқариб юборилган. Жума куни яна қайта касалхонага ётқизилди. Бош миясини МРТ қилиб, текшириб кўрдик, унда яққол бош мия чайқалиш ҳолати бор эди”, дейди М.У.нинг қариндошларидан бири.

Навоий ИИБ ахборот хизмати расмий маълумотига кўра, Кармана туманида яшовчи 1994 йилда туғилган С.А. ўз танишлари билан ресторанга овқатланишга борган.

“Фуқаро С.А. тўловни амалга оширган ва етмай қолган маълум миқдордаги пул маблағини машинадан олиб бериш учун ташқарига чиққан вақтида ресторанда ишловчи М.У. унинг олдига бориб, қолган тўлов пулини ҳам амалга оширишини сўраган. Спиртли ичимлик таъсирида бўлган С.А. ўзаро оғзаки тортишиб қолиб, жамиятда юриш-туриш қоидаларини қасддан менсимасдан, ўзига олдиндан таниш бўлмаган фуқаро М.У.ни ҳеч бир сабабларсиз қўли билан юз соҳасига уриб, тан жароҳати етказган”, дейилади ИИБ маълумотида.

Суриштирувлар давомида С.А. ресторанга спортчи Элбек Султонов билан бирга унинг машинасида боргани, ўзаро тортишув келиб чиққан жараёнда спортчи машинада бўлгани ва ҳолатга кейинчалик аралашиб, С.А.ни тинчлантиришга ҳаракат қилгани аниқланган. Ҳолат юзасидан Жиноят кодексининг 277-моддаси (Безорилик) 1-қисми билан жиноят иши қўзғатилган.

Ҳозирда тергов ҳаракатлари олиб борилмоқда.