Рютте: Россиянинг Украинага қўшин киритилишини тақиқлашга ҳаққи йўқ

Тинчлик келишувига эришилса, Украина ҳудудида Ғарб қўшинларининг бўлиши мумкинлиги ёки йўқлигини ҳал қилишга Москванинг ҳаққи йўқ, бу масалада фақат Киев қарор қабул қилиши мумкин. Бу ҳақда 4 сентябр, пайшанба куни Халқаро стратегик тадқиқотлар институтининг Прага мудофаа саммитида НАТО бош котиби Марк Рютте айтиб ўтди.

«Россиянинг Украина ҳақида фикри нима учун бизни қизиқтириши керак? Украина мустақил давлат. У ўз хавфсизлигини қандай таъминлашни ўзи ҳал қилади. Финландия Россиядан НАТОга аъзо бўлиш учун рухсат сўрамаган. Биз ҳам суверен давлатлармиз ва агар Украина тинчликни сақлаш учун хавфсизлик кучларини таклиф қилиш зарур деб ҳисобласа, бу унинг ҳуқуқидир», — деди Рютте Россия президенти Владимир Путиннинг Украина ҳудуди ҳақидаги сўзларини изоҳлар экан. 

НАТО бош котибининг таъкидлашича, Қўшма Штатлар Украинадаги тинчликпарварлик миссиясини қўллаб-қувватлашга тайёр, аммо у ерга Америка қўшинларини юбориш ҳақида гап бўлиши мумкин эмас. Унинг сўзларига кўра, президент Доналд Трамп Киев учун ҳақиқий кафолатлар зарурлигини тушунади ва шу йўналишда ҳаракат қилмоқда. «У Будапешт меморандуми ёки Минск келишувларидаги хатоларни такрорламайди», деб таъкидлади Марк Рютте.