Трамп ЕИга Google учун жарима туфайли жавоб чоралари билан таҳдид қилди

АҚШ президенти Доналд Трамп Еврокомиссиянинг Американинг Google компаниясига нисбатан қўйган 2,95 миллиард евро миқдоридаги жаримасини «адолатсиз» деб атади ва Европа Иттифоқига жавоб чоралари билан таҳдид қилди. «Европа Иттифоқи Америка компанияларига нисбатан бу амалиётни дарҳол тўхтатиши керак!» - дея у 5 сентябр, жума куни ўзининг Truth Social ижтимоий тармоғида ёзган. У Googleʼдан ташқари, Европа Иттифоқи тартибга солувчилари томонидан бир неча бор жаримага тортилган Appleʼни ҳам эслатиб ўтди.

Оқ уй раҳбарининг сўзларига кўра, Брюссел Америка компанияларига нисбатан «камситиш ҳаракатлари» билан АҚШнинг иш ўринлари ва сармояларига таҳдид солмоқда. Агар жарималар ўз кучида қолса, Трамп 301-модда бўйича бошқа давлатларнинг АҚШ учун салбий бўлган савдо сиёсатига, жумладан, тарифларга қарши жавоб чораларини кўришни назарда тутувчи тартибни бошлашга ваъда берди.

Брюссел иддао қилишича, Google 2014 йилдан буён ўз хизматларидан рақобатчилар зарарига фойдаланмоқда, бу Европа Иттифоқи фаолияти тўғрисидаги шартноманинг 102-моддасини бузиш ҳисобланади. Европа комиссиясининг текшируви шуни кўрсатадики, Google бозорда устун мавқени эгаллаб, ўз маҳсулотларига устунлик бериб келмоқда.