Европа Иттифоқи Google’ни қарийб 3 миллиард еврога жаримага тортди

Еврокомиссия Google эгаси бўлган Американинг Alphabet компаниясини реклама технологиялари бозоридаги устун мавқеини суиистеъмол қилгани учун 2,95 миллиард евро миқдорида жаримага тортди.

Комиссиянинг тушунтиришича, Google реклама берувчилар ва онлайн нашриётларни рақобатчиларга зарар етказган ҳолда ўз хизматларига устунлик берган ва шу тариқа онлайн реклама бозорини бузган. Еврокомиссия компания бу амалиётни ва ўз хизматларига устунлик беришни тўхтатиши керак, деган қарорга келди.

Google бу қарор устидан шикоят қилишга ваъда берди. Компаниянинг норматив масалалар бўйича вице-президенти Ли-Энн Малхолланднинг айтишича, Еврокомиссия қарори «минглаб Европа компанияларига зарар етказадиган, уларнинг пул ишлаш имкониятини қийинлаштирадиган ўзгаришларни талаб қилади».

Еврокомиссия қарори, Bloomberg таъкидлаганидек, Европа Иттифоқи ва АҚШ ўртасидаги савдо муносабатлари кескинлашган пайтда қабул қилинди. Доналд Трамп бир неча бор Европа Иттифоқининг «бигтех»ларга нисбатан хатти-ҳаракатларини танқид қилган ва Европани Америка компанияларини тийиб туришга қаратилган меъёрий ҳужжатлар қабул қилгани учун жавобгарликка тортиш билан таҳдид қилган эди.

Бу сафар Доналд Трамп Еврокомиссия қарорига жавобан 1974 йилги Савдо тўғрисидаги қонуннинг 301-моддаси бўйича тергов бошлаш билан таҳдид қилди. Ушбу қонун АҚШ президентига бошқа мамлакатларнинг Америка бизнесига нисбатан «адолатсиз» деб ҳисобланган хатти-ҳаракатларига бир томонлама жавоб қайтариш ҳуқуқини беради. 

«Бугун Европа Американинг яна бир буюк компанияси Google’га «зарба берди», унга 3,5 миллиард доллар жарима солди, бу Америка инвестициялари ва иш ўринларига сарфланадиган пуллар эди», деб ёзди Трамп.

2017 йилда Еврокомиссия бозордаги устун мавқени суиистеъмол қилгани учун Google компаниясини 2,4 миллиард евро жаримага тортди.

2018 йилда Google монополияга қарши қонунчиликни бузгани учун яна 4,3 миллиард евро жаримага тортилди.