ҲАМАС зудлик билан музокараларга тайёрлигини билдирди

Трампнинг айтишича, Исроил гаровга олинганларни озод қилиш бўйича келишув тузиш шартларини аллақачон қабул қилган ва ҲАМАСдан ҳам уларни қабул этишни талаб қилган. Шундан сўнг ҲАМАС музокара столига ўтиришга тайёр эканини маълум қилди.

Фото: Majdi Fathi/Keystone Press Agency/Global Look Press

АҚШ президенти Доналд Трампнинг «якуний огоҳлантириши» ортидан Фаластиннинг ҲАМАС ҳаракати Ғазо секторидаги урушни тўхтатиш ва «барча маҳбусларни» озод қилиш учун зудлик билан музокаралар столига ўтиришга тайёрлигини маълум қилди. 7 сентябр, якшанба оқшомида тарқатилган баёнотда ҲАМАС аввалроқ воситачилар орқали «Америка томондан ўт очишни тўхтатишга эришишга қаратилган баъзи ғоялар» олганини билдирди.

2023 йил 7 октябрда асирга олинган исроилликларни озод қилиш эвазига ҳаракат Исроилдан «урушни тўхтатиш, Ғазо секторидан қўшинларни тўлиқ олиб чиқиш ва Ғазо секторини бошқариш учун мустақил фаластинликлардан иборат қўмита тузиш ҳақида аниқ баёнот беришни» талаб қилмоқда.

Шу куни эрталаб Оқ уй раҳбари ўзининг Truth Social ижтимоий тармоғида Исроил ўзи таклиф қилган келишув шартларини қабул қилгани ва ҲАМАС ҳам уларга кўниши кераклигини ёзган эди. «Мен ҲАМАСни рад этиш оқибатлари ҳақида огоҳлантирдим. Бу менинг охирги огоҳлантиришим, бошқаси бўлмайди», — дея таъкидлади Трамп.

Тайёрлаган: Отабек Матназаров

#АҚШ #Ғазо #ҲАМАС #сионизм

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.