Трамп Россияга қарши санкцияларни кучайтиришга тайёрлигини маълум қилди

Россиянинг учувчисиз учоқлари Украинага энг йирик зарба берган куни АҚШ президенти Доналд Трамп Россияга қарши санкцияларни кучайтириш ниятида эканлигини билдирди. 7 сентябр, якшанба куни Вашингтонда журналистларнинг Украинага қарши кенг кўламли уруши муносабати билан Россияга қарши санкцияларнинг «иккинчи босқичи»га ўтишга тайёрлиги ҳақидаги саволига жавоб берар экан, у шундай деди: «Ҳа, мен тайёрман».

Трамп ўз режалари ҳақида ҳеч қандай маълумот бермади, ОАВ ҳам унга аниқлик берувчи саволлар йўлламади.

Ўз навбатида, АҚШ молия вазири Скотт Бессент АҚШ ва Европанинг қўшимча иқтисодий босими Россия президенти Владимир Путинни Украина билан тинчлик музокараларини бошлашга ундаши мумкинлигини тахмин қилди. «Агар АҚШ ва Европа Иттифоқи чора кўрса ва Россия нефтини сотиб олувчи давлатларга нисбатан янги санкциялар ва иккиламчи божлар жорий қилса, у ҳолда Россия иқтисодиёти бутунлай таназзулга юз тутади ва бу президент Путинни музокаралар столига ўтиришга мажбур қилади», — деди Бессент NBC News телеканалида.

АҚШ Молия вазирлиги раҳбари Трамп маъмурияти Россияга босимни кучайтиришга тайёрлигини таъкидлади. Аммо бунда европалик ҳамкорлар ҳам иштирок этиши керак, дея қўшимча қилди у.