Урсула фон дер Ляйен Евроиттифоқ–Исроил эркин савдосини тўхтатишга чақирди

Исроил ҳукуматини энг кескин танқид қилган чиқишида фон дер Ляйен Ғарбий Соҳилни иккига бўлувчи ноқонуний посёлка қуриш режаларини, шунингдек, экстремистик исроиллик вазирларнинг зўравонликка даъватларини «икки давлат ечимини издан чиқаришга қаратилган очиқ уриниш» деб атади. The Guardian нашрининг ёзишича, унинг бу фикрлари Европа парламентида Страсбургда қилган йиллик «иттифоқ ҳолати» нутқида янгради.

Фон дер Ляйен Европанинг Ғазога жавоб бера олмаганини оғриқли деб таърифлаб, Евроиттифоқ ижроия органи Исроилга икки томонлама ёрдамни тўхтатишини эълон қилди. Бунда фақат фуқаролик жамияти гуруҳлари ва Холокост ёдгорлик маркази ёрдам олишда давом этади. Комиссия шунингдек, Евроиттифоқ-Исроил ассоциация келишувининг савдо қисмларини тўхтатиш бўйича таклифлар киритади ва Ғарбий Соҳилдаги исроиллик экстремист вазирлар, зўравонлик содир қилганларга қарши санкциялар лойиҳасини ишлаб чиқади.

Аммо Евроиттифоқ бу борада бўлинган ва Исроил билан эркин савдони тўхтатиш учун зарур кўпчиликнинг қўлловини топиши номаълум. Ҳаттоки, иттифоқда Исроилга қарши камроқ амбицияли чоралар ҳам ҳозирча тўсиб қўйилган.

Евроиттифоқ — Исроилнинг энг йирик савдо ҳамкори, ўртада йилига 68 миллиард евролик товар ва хизматлар алмашинуви бор. Танқидчилар узоқ вақтдан бери Европани ўзини иқтисодий босим кучидан фойдаланишга чақириб келишган: Исроил глобал товар савдосининг 32 фоизи ЕИ билан, аммо ЕИнинг умумий савдосида Исроил улуши атиги 0,8 фоиз. 2000 йилда имзоланган Евроиттифоқ-Исроил ассоциация келишуви эркин савдо ҳудуди яратган. Икки ўртада тадқиқот, экология ва энергетика сиёсатида ҳамкорликни тарғиб қилган.

Овоз беришдаги муаммолар сабабли фон дер Ляйен Евроиттифоқ ташқи сиёсатини бошқаришда якдиллик тамойилини тугатиш тарафдори эканини такрорлади ва «якдиллик кишанларидан халос бўлиш вақти келди», деди.

Европа парламентидаги социалистлар етакчиси Гарция Перес бу қадамларни олқишлади, бироқ уларни «жуда кам ва жуда кеч» деб атади.