Трамп: Зеленский Россия билан келишувга эришиши керак

АҚШ президентининг сўзларига кўра, Володимир Зеленский Путин билан «келишувга эришиши» керак. Трамп, шунингдек, уларнинг учрашувида қатнашишини истисно этмади, чунки Украина ва Россия президентлари «бир-бирларидан нафратланади».

Фото: Ben Curtis / AP

Украина президенти Володимир Зеленский Украинадаги урушни тугатиш учун Москва билан «келишувга эришиши» керак. Бу ҳақда 16 сентябр, сешанба куни АҚШ президенти Доналд Трамп Буюк Британияга сафаридан олдин айтиб ўтди. Трамп қандай келишув ҳақида гапираётганига аниқлик киритмади.

Америка етакчиси, шунингдек, Зеленский ва Россия президенти Владимир Путин ўртасидаги эҳтимолий музокараларда иштирок этишини истисно этмади. «Танго учун икки киши керак. Булар бир-биридан нафратланадиган икки киши, Зеленский ва Путин ҳамда мен улар билан бир хонада ўтиришга мажбур бўламан шекилли, чунки улар бирга хонада ўтира олмайди. Нафрат кўп», — дея Трампнинг сўзларини келтиради Independent нашри.

Аввалроқ АҚШ давлат котиби Марко Рубио Трамп ва Зеленский келаси ҳафтада Ню-Йоркдаги БМТ Бош ассамблеясида учрашиши мумкинлигини айтган эди. Рубионинг сўзларига кўра, АҚШ президенти Россиянинг Украинага қарши урушини тўхтатиш учун қўлидан келган барча ишни қилишга уринмоқда.

«У ҳаракат қилишда давом этади. Агар тинчлик имкони бўлса, унга эришишни истайди. Қайсидир нуқтада президент бунинг иложи йўқ деган хулосага келиши мумкин. У ҳали бу даражага етмаган, лекин етиши мумкин», — дейди Рубио. Трамп ва Зеленский охирги марта 18 август куни Вашингтонда учрашган.

Тайёрлаган: Отабек Матназаров

#Россия #Доналд Трамп #Володимир Зеленский