Путин менга панд берди – Трамп

АҚШ президенти Доналд Трамп 18 сентябр куни Украинадаги можарони ҳал қилиш ўзи кутганидан кўра қийинроқ бўлаётганини ва Россия президенти Владимир Путин унинг ҳафсаласини пир қилганини айтди. Бу ҳақда Sky News хабар берди.

«Мен Путин билан муносабатларим туфайли Россия ва Украина ўртасидаги урушни осонроқ ҳал қилиш мумкин деб ўйлагандим, лекин у менга панд берди, у ҳақиқатан ҳам панд берди», деди Трамп Буюк Британия бош вазири Кир Стармер билан қўшма матбуот анжуманида.

Шунингдек, АҚШ президенти Россия Украинага қараганда кўпроқ аскар йўқотмоқда, деган фикрни билдирди.

«Путин кўплаб одамларни ўлдирмоқда. У ўлдиришдан кўра кўпроқ одам йўқотяпти. Россия аскарлари Украина аскарларига қараганда кўпроқ ҳалок бўлмоқда», деди Трамп.

Трамп агар Байден эмас, ўзи АҚШ президенти бўлганида, Украинада кенг кўламли уруш ҳеч қачон бошланмас эди, деди. Оқ уй раҳбари буни кўп марта такрорлаган.

«Бу урушда миллионлаб одамлар, миллионлаб одамлар ҳалок бўлди ва бу америкалик аскарлар эмас. Аскарлар Иккинчи жаҳон урушидан бери ҳеч ким кўрмаган тезликда ҳалок бўлмоқда. Мен айнан шу сабабга кўра бу муаммони ҳал қилишга мажбурман, деб ўйлайман», деди Трамп.

Нашрнинг қўшимча қилишича, Трамп Украина президенти Володимир Зеленскийга Овал кабинетда айтган гапини такрорлади - можаро учинчи жаҳон урушига айланиб кетиши мумкин.