АҚШ БМТ ХКнинг Ғазо бўйича резолюциясига яна вето қўйди

Қўшма Штатлар Ғазо секторида «зудлик билан, сўзсиз ва доимий» ўт очишни тўхтатишни, шунингдек, Исроилнинг Фаластин ҳудудига гуманитар ёрдам етказилишига қўйган барча чекловларини олиб ташлашни талаб қиладиган Бирлашган Миллатлар Ташкилоти (БМТ) Хавфсизлик кенгаши резолюцияси лойиҳасига вето қўйди. Бу ҳақда Reuters агентлиги 18 сентябр, пайшанба куни хабар бериб, Вашингтон бундай ҳужжатга олтинчи марта вето қўйганини қўшимча қилди.

«Қўшма Штатлар ушбу қабул қилиб бўлмайдиган резолюцияни рад этади. ҲАМАС учун барча гаровга олинганларни истисносиз зудлик билан озод қилиш ва сўзсиз таслим бўлиш вақти келди. Қўшма Штатлар бу даҳшатли можарога барҳам бериш учун ўз ҳамкорлари билан ишлашда давом этади», — деди АҚШнинг БМТдаги доимий вакили Морган Ортагус Доналд Трамп маъмурияти қарорини оқлаб.

Резолюция лойиҳаси БМТ Хавфсизлик кенгашининг 15 аъзосидан ўнтаси томонидан тайёрланган. Қолган 14 мамлакат, АҚШдан фарқли ўлароқ, Исроилнинг ҲАМАС билан деярли икки йиллик урушидан сўнг БМТнинг Ғазо секторида очарчилик ҳақида расмий эълонига жавобан август ойида ҳужжатни қўллаб-қувватлади. Аввалроқ, 2024 йил февралида ўтказилган учинчи овоз беришда БМТ олий органининг фақат битта доимий аъзоси – Буюк Британия бетараф қолган эди.