Трамп ва Си Россия ва Украина можаросини тўхтатишни муҳокама қилди

АҚШ президенти Доналд Трамп Хитой раиси Си Жинпинг билан сўнгги уч ойдаги илк телефон мулоқоти натижалари ҳақида гапирди. Улар Россия-Украина ҳарбий можаросини ҳал қилиш, TikTok ижтимоий тармоғи бўйича келишув ва Жанубий Кореяда бўлиб ўтадиган учрашувни муҳокама қилди.

«Биз кўплаб муҳим масалалар, жумладан, савдо, фентанил муаммоси, Россия ва Украина ўртасидаги урушга чек қўйиш зарурати, шунингдек, TikTok битимини маъқуллаш бўйича олдинга силжишга эришдик», деб ёзди Трамп Truth Social ижтимоий тармоғида.

Оқ уй раҳбари сўзларига кўра, етакчилар 31 октябрдан 1 ноябргача бўлиб ўтадиган Осиё-Тинч океани иқтисодий ҳамкорлиги саммитида учрашишга келишиб олган. Америка президенти, шунингдек, келаси йил бошида Хитойга шахсан ташриф буюриш режалари ҳақида гапирди, «раис Си эса, ўз навбатида, қулай вақтда АҚШга келади». «Суҳбат жуда яхши ўтди, биз телефон орқали мулоқотни давом эттирамиз», деб қўшимча қилди у.

Трамп ва Си охирги марта 5 июн куни қўнғироқлашган. Бу уларнинг АҚШ савдо божларини жорий этишга қарор қилганидан кейинги биринчи суҳбати эди. Бугунги мулоқотлар якунига кўра, Хитой раҳбари Пекин ва Вашингтон ўртасидаги муносабатлар жуда муҳим экани, ҳар икки давлат умумий фаровонликка интилиши, ўзи ва бутун дунёга фойда келтириши мумкинлигини айтди.

«Иккала томон ҳам муносабатлардаги баъзи масалаларни тўғри ҳал қилишда давом этиши ва ўзаро манфаатли натижага эришишга интилиши мумкин», деди Си.