Кремл Трампнинг Россияни «қоғоздаги йўлбарс»га қиёслаганига жавоб қайтарди

Кремлнинг фикрича, АҚШ президенти Доналд Трампнинг Киевнинг Россия томонидан босиб олинган ҳудудларини қайтариб олиш имконияти ҳақидаги баёнотлари Украина президенти Володимир Зеленский таъсирида берилган. Шу нуқтаи назардан, Россия президенти матбуот котиби Дмитрий Песков Трампнинг Россияни «қоғоздаги йўлбарс»га қиёслаганини рад этди. «Россия йўлбарс эмас, Россия айиқ билан яқинроқ боғланган. Қоғозли айиқлар эса бўлмайди», — деди Песков 24 сентябр, чоршанба куни.

«Трампнинг баёнотлари унинг Зеленский билан суҳбатидан сўнг ва афтидан, Зеленский тақдим этган қарашлар таъсирида айтилган. Бу қараш бизнинг ҳозирги вазият ҳақидаги тушунчамиздан кескин фарқ қилади», — деди Песков. Унинг қўшимча қилишича, Россия ташқи ишлар вазири Сергей Лавров Ню-Йоркдаги БМТ Бош ассамблеяси доирасида «Россия позициясини Америка томонига етказиш» имкониятига эга бўлди.

Дмитрий Песков Трампнинг Россия «чуқур иқтисодий муаммода» деган баёнотига изоҳ берар экан, Россия иқтисодиёти «мутлақо барқарорлик ва прогнозлиликни сақлаб қолгани» ва жорий қилинган санкцияларга қарамай, Украина билан урушда қуролли кучларнинг «эҳтиёжларини тўлиқ қондиришга» ҳаракат қилаётганини таъкидлади. Песковнинг фикрича, Трампнинг баёнотлари биринчи навбатда «АҚШ бизнес манфаатлари» ҳамда нефт ва газни кўпроқ сотиш истагидан келиб чиққан.