Лукашенко Зеленский билан урушни тугатишни муҳокама қилишга тайёр

Александр Лукашенконинг сўзларига кўра, Украина бўйича «столда яхши таклиф бор». «Агар келишувга эришмасак, бу ҳамма учун ёмон бўлади», деди Беларус раҳбари Кремлда Владимир Путин билан учрашувдан кейин.

Фото: AP

Беларус раҳбари Александр Лукашенко Украина президенти Володимир Зеленский билан гаплашишга тайёр. Бу ҳақда Лукашенконинг ўзи «Россия 1» телеканали мухбири Павел Зарубинга берган интервюсида маълум қилди. Зарубин 26 сентябр, жума куни Лукашенконинг Россия президенти Владимир Путин билан Кремлда бўлиб ўтган музокараларидан сўнг бўлиб ўтган ушбу суҳбатдан парчаларни ўзининг Telegram-каналида жойлаштирди.

«Унга айтадиган гапим бор (Зеленскийга)», — деди Лукашенко. «Менимча, маслаҳатлашувга киришиш вақти келди. «СВО»нинг бошида (Россия ҳукумати ва кремлпараст ОАВ Украинадаги урушни шундай атайди) биз, учта славян давлати раҳбарлари, ўтириб, бир тўхтамга келишимиз кераклигини айтганман. Бу тушунарсиз урушни тўхтатишга рози бўламиз. Агар келишиб олишимиз керак бўлса, келишиб оламиз», — деди Лукашенко.

Украинага келсак, «стол устида яхши таклиф бор», уни АҚШ президенти Доналд Трамп Аляскада эшитиб, «кўриб чиқиш ва муҳокама қилиш» учун Вашингтонга олиб кетди, дея давом этган Лукашенко. «Жуда яхши таклиф», деди у ва ушбу шартлар Володимир Зеленский учун маъқул, «америкаликлар уларни умуман маъқуллаган» деган фикрни билдирди. Вашингтон ҳозирча бу маълумотга изоҳ бермаган.

Лукашенкога кўра, улар 2022 йилда тўхтаб, тинчлик ўрнатиши керак эди. Шунда Қримдан ташқари бутун шарқ Украинага тегишли бўларди.

Тайёрлаган: Отабек Матназаров

#Александр Лукашенко #Володимир Зеленский